Куорат Ытык сүбэтэ Ил Дархаҥҥа сурук суруйар

Олохтоох дьаһалта официальнай саайта иһитиннэрэринэн, кулун тутар 11 күнүгэр буолан ааспыт Дьокуускай куорат Ытык сүбэтин уочараттаах мунньаҕа нэһилиэнньэни, ол иһигэр гражданнар кэккэ категорияларын эминэн хааччыйыы, тыын суолталаах эмп-томп сыанатын судаарыстыба хонтуруолугар ылыы боппуруоһун көтөхтө.

Мунньахха доруобуйа харыстабылын министиэристибэтин, фармацевтическэй, хонтуруоллуур тэрилтэлэр бэрэстэбиитэллэрэ уонна Дьокуускай куорат Уопсастыбаннай палаатата ыҥырыллан кыттыбыттар.

Ол курдук, ытык кырдьаҕастар уонна куорат Уопсастыбаннай палаатата эмп сыаната хонтуруолланыахтааҕын туруорсубуттар, куорат кытыы оройуоннарыгар аптека аҕыйаҕын бэлиэтээбиттэр, тыын суолталаах эмп-томп испииһэгин, «Сахафармация» тэрилтэни кытта хас аптека үлэлэһэрин сураспыттар. Маны сэргэ, араас мааһы, эгэлгэ эми оҥорон, интэриниэт нөҥүө атыылыыр «эмчиттэр» бородууксуйаларын, о.д.а. интэриэһиргээбиттэр.

Мунньах түмүгүнэн Дьокуускай куорат Ытык сүбэтэ СӨ Ил Дарханыгар, СӨ Бырабыыталыстыбатыгар куорат нэһилиэнньэтин эминэн хааччыйыыны үбүлээһини толору кээмэйинэн оҥорор туһунан сурук суруйарга быһаарыы ылыммыт. Бу туһунан Дьокуускай куорат Уопсастыбаннай палаатата иһитиннэрэр.

Санатар буоллахха, бэҕэһээ, кулун тутар 12 күнүгэр буолан ааспыт Бырабыыталыстыба отчуотугар, СӨ доруобуйа харыстабылын миниистирэ Лена Афанасьева 2026 сылга Саха сирин олохтоохторун эминэн хааччыйыыны үбүлээһин кээмэйэ 3,8 млрд солк. диэри улаатыннарыллыбытын туһунан этэн турар.

«Бу сыалга быйыл өрөспүүбүлүкэ бүддьүөтүттэн 3,8 млрд солк. көрүлүннэ, ол эбэтэр ааспыт сыллааҕар 1 млрд 96 мөл. солк. элбэх. Үбүлээһин кээмэйин улаатыннарыы нэһилиэнньэ кэккэ категориятын туһааннаах эминэн хааччыйыы хаачыстыбатын тупсарар аналлаах. Маны сэргэ бүгүҥҥү күҥҥэ эми кииннэммит атыылаһыы механизма олохтонно, ол эбэтэр бүддьүөт харчыта ордук көдьүүстээхтик туттуллар буолла», – диэн турар Лена Афанасьева.

Миниистир бэлиэтээбитинэн, доруобуйа харыстабылын министиэристибэтин суһал линиятынан – 122 нүөмэринэн эрийэн, былырыын 3 тыһыынчаттан тахса киһи маннык хабааннаах кыһалҕата быһаарыллыбыт.

Ил Дархан пресс-сулууспата иһитиннэрэринэн, 2025 сылга Саха сиригэр чэпчэтиилээх эминэн хааччыйыы бырагырааматынан 198 тыһ. киһи, ол эбэтэр нэһилиэнньэ 19% хабыллыбыт.