Куорат ыччатыгар сонун тэрээһин

Төрөөбүт төрүт тылбыт сүппэтин туһугар Дьокуускай куоракка араас хайысхалаах үлэ ыытыллар. Ол курдук, аҕыйах хонуктааҕыта “Саха тыла-400” уопсастыбаннай хамсааһын актыбыыстара – “Сайдыс” оҕо киинин дириэктэрэ Юлия Андросова, суруналыыс Яна Угарова көҕүлээһиннэринэн, Дьокуускай куорат дьаһалтатын өйөбүлүнэн  “Арассыыйа – мин историям” мусуойга “Тренд на сахалыы” форсайт-сиэссийэни ыытан, элбэх оҕону түмтүлэр.

Тэрээһиҥҥэ куорат баһылыга Евгений Григорьев, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Анатолий Семенов, “Дыгын оонньууларын” муҥутуур кыайыылааҕа Борис Сдвижков, биллиилээх боксер, Европа чөмпүйүөнэ Василий Егоров, блогер Масаха, саха ырыаһыттара Лэгэнтэй, Инвент, Аман Анхаров уо.д.а кыттыыны ыллылар.  Киһи үөрэрэ, бу тэрээһиҥҥэ куорат уонна куорат сэлиэнньэлэрин оскуолаларыттан 200-кэ үөрэнээччи кыттыыны ылла.

Сүрүн кэпсэтии төрөөбүт тыл тула барда. Тэрээһин Күндэ “Төрөөбүт тыл” хоһоонугар хоһуйбутун курдук, олус истиҥник, дириҥ ис хоһоонноохтук ыытылынна. Төрөөбүт тылбыт үйэлэри уҥуордаан кэлбитин, эн-мин диэн сахалыы кэпсэтэн, норуот быһыытынан күн бүгүн баарбытын, үгэстэрбитин илдьэ сылдьарбытын, тэрээһини ыытааччы Яна Угарова уонна бу форсайт-сессия кыттыылаахтара бигэргэттилэр.

Бу күн барыга көхтөөх, лиидэр оҕолор салгыы оскуолаларыгар сахалыы эйгэни тэрийэр сыаллаах тарҕастылар.

Хаартыскаларынан тэрийээччилэр хааччыйдылар