Куорат ыһыахха бэлэмнэнэр

Ыам ыйыгар буолбут сүбэ мунньах кэнниттэн бырааһынньык былаһааккатыгар тиэрдэр мас муоста үрдэ өрөмүөннэммит, сылгылар киирэн тэпсибэттэрин курдук туруоруллар хахха баар буолбут. Ыһыахтыыр сиргэ тиийэр суолу грейдэрдии сылдьаллар. 
Парковканы биллэ кэҥэтэн биэрбиттэр. Ол курдук, Drivee 100 массыыната тохтоон турарыгар суоттаммыт эбии сир баар буолбут.  

Ыһыах күннэригэр билигин өрөмүөҥҥэ турар Сэбиэскэй Аармыйа 50 сылын аатынан уулусса аһыллыаҕа. Ыһыах тэрээһинигэр эппиэттээх тэрилтэлэр быһаарыллыбыттар.

Бэс ыйын 15 күнүттэн Үс Хатыҥныыр суолу уонна куораты бырааһынньыктааҕы киэргэтии саҕаланыа. Ураты болҕомто, иннинээҕи сылларга курдук, ыһыах кыттыылаахтарыгар уонна ыалдьыттарыгар куттал суох буолуутун хааччыйарга ууруллуоҕа.

Бу туһунан куорат баһылыга Евгений Григорьев телеграм-ханаалыгар суруйар.