Куорат уопсай мунньаҕыттан

Бэнидиэнньиккэ ыытыллыбыт планеркаҕа баһылык Евгений Григорьев Птицефабрика оройуонун томторугар сири хаспыттара ый буолла, Айылҕа харыстабылын Дьокуускайдааҕы кэмитиэтэ  туох да миэрэни ылбат диэн кириитикэлээтэ.

«Бэҕэһээ эрэ тахса сылдьыбытым, 9 массыына сири хаһа турара. Итинник табыллыбат. Хонтуруоллуохтаах уорганнар ханна баалларый?» – диэтэ куорат баһылыга.

Айылҕа харыстабылын Дьокуускайдааҕы кэмитиэтин бэрэстэбиитэлэ иһитиннэрбитинэн, Россельхознадзор кыттыылаах мунньах ыытыллыбыт, ол түмүгэр сир бас билээччиллээҕэ биллибит. Бу Олохтоох дьаһалта дааннайдарын кытта сөп түбэспэт.

Евгений Григорьев бэлиэтээбитинэн, айылҕа харыстабылын прокуратуратыгар сурук ыытыллыбыт, ол эрээри хардата кэлэ илик.

Мунньахха этиллибитинэн, сири-буору хаһан эргинэр дьоҥҥо сыһыаннаах сытыытык турбут боппуруос бу нэдиэлэҕэ куорат баһылыгын таһымыгар, прокуратура бэрэстэбиитэллэрэ кыттыылаах көрүллүөҕэ.  

Куорат баһылыга уопсастыбаннай туоналарга, чуолаан саҥа сирдэргэ ууруналары ыраастааһын күннээҕи нуорматын хат көрөргө дьаһайда.

Евгений Григорьев ааспыт өрөбүллэргэ быйыл саҥа тупсарыллыбыт эбийиэккэ – Роман Дмитриев аатынан кытылга ууруналар туолан турбуттарын холобурдаата.

«Сабыс-саҥа уопсастыбаннай туоналарга ууруналар тобус-толору тураллара табыллыбат. Сайыҥҥы кэмҥэ киһи элбиир, куорат олохтоохторо ордук саҥа кытылларга сөбүлээн сылдьаллар. Онон бөҕү хомуйууну күүһүрдүөххэ, олохтоммут нуорманы хос көрүөххэ наада», – диэтэ баһылык.

Манна даҕатан эттэххэ, күн бүгүн куорат уулуссаларыгар 1300-тэн тахса ууруна турар, ол көрүүнү-истиини эрэйэр. Ону ыраастааһынынан сүрүннээн уокуруктар управаларын бэдэрээттиир тэрилтэлэр дьарыктаналлар.    

Ааспыт нэдиэлэҕэ уопсастыбаннай тырааныспар үлэтин кэтээн көрүү түмүгүнэн 2-с уонна 18-с №-дээх маршруттар көрдөрүүлэрэ 90 %-тан намыһаҕа билиннэ.

Куорат баһылыга туһааннаах лот салайааччытыгар ыстараап түһэрэргэ соруйда.

Ааспыт нэдиэлэҕэ Дьокуускайга СӨ Административнай быраабы кэһиилэр тустарынан кодексатын 6.25 ыст. олоҕуран, 18 боротокуол толорулунна. Ол иһигэр 8-һа – сири-уоту бөҕүрдүү, сыыһырдыы, 8-һа – көҥүлэ суох сыбаалкалар иһин.  Боротокуоллар арыгынан эргинэр маҕаһыыннарга, элбэх кыбартыыралаах дьиэлэри салайар хампаанньаларга, онтон да атын юридическай уонна физическэй сирэйдэргэ сыһыаннаах толорулуннулар.

Манна эбэн эттэххэ, таһырдьа сылыйыаҕыттан 2842 куб. миэтэрэ көҥүлэ суох сыбаалка хомуллан тиэйиллибитэ бэлиэтэннэ.

Нэдиэлэ иһигэр Дьокуускай куоракка санитарнай туочукалартан 16800 куб. миэтэрэ бөх тиэйиллибит. Ити орто көрдөрүүттэн 5-6 тыһыынча куб.миэтэрэнэн элбэх.  

«Якутскэкосети» ХЭТ маны өрөмүөн кэмэ саҕаламмытын кытта ситимниир: санитарнай туочукаларга тутуу бөҕө кыстанара биллэ элбээбит, ону сэргэ, куорат олохтоохторо эргэрбит, туһата суох малларын быраҕаллара үксээбит.