Куорат уһуйааннарын педагогтара ааҕыыга кытыннылар

Ааспыт нэдиэлэҕэ Дьокуускай үөрэҕириигэ управлениетын оскуола иннинээҕи үөрэхтээһин отделын тэрийиитинэн IV Баишевтыы педагогическай ааҕыылар буоллулар.

Быйылгы ааҕыылар дойдуга Аҕа дойдуну, өрөспүүбүлүкэҕэ Ийэ дойдуну көмүскээччилэр сылларыгар уонна «Кустук» 26-с №-дээх оҕо сайдар киинэ тэриллибитэ 35 сылыгар ананна. «Кустук» оҕо сайдар киинин сэбиэдиссэйэ Александра Федорова уонна оскуола иннинээҕи үөрэхтээһин отделын сүрүн исписэлииһэ Альбина Борисова кыттааччылары эҕэрдэлии көрүстүлэр. Педагогическай ааҕыылар бочуоттаах ыалдьыттарынан СӨ үөрэҕириитин бочуоттаах бэтэрээнэ, 26 №-дээх оҕо саадыгар 1995-2014 сылларга сэбиэдиссэйдээбит Надежда Прохоровна Баишева уонна РФ үөрэҕириитин бочуоттаах үлэһитэ, 26 №-дээх оҕо саадыгар 1995-2011 сылларга педагог-психологынан үлэлээбит Светлана Михайловна Баишева буоллулар.

Тэрээһиҥҥэ Дьокуускай куорат уһуйааннарыттан уопсайа 49  педагог кыттан, икки сиэксийэнэн тус уопуттарын үллэһиннилэр.  

Педагогическай ааҕыылары ыытыы сүрүн соругунан оскуола иннинээҕи үөрэхтээһиҥҥэ педагогтар инновационнай уопуттарын тарҕатыы буолар.