Куорат тупсаҕай эйгэтин бастыҥ бырайыагар куоластааҥ

Быйыл эбийиэктэри тупсаҕай көстүүлээх оҥоруу куоластааһыныгар Дьокуускай 8 уопсастыбаннай туонатын бырайыага киирдэ.
Куоластааһын муус устар 21 күнүттэн бэс ыйын 12 күнүгэр диэри Госуслуги портал нөҥүө ыытыллар.
Ханнык эбийиэктэргэ куоластыыбыт?
Юрий Алексеевич Гагарин аатынан сквер
Сквер Гагарин уокуругар Можайскай аатынан уулуссаҕа баар. Манна сынньанарга аналлаах, мемориальнай, дьаарбайар, оҕоҕо аналлаах уонна быыстапкалыыр сирдэрдээх буолуо. Билигин баар үс пааматынньык саҥардыллыа: «Аляска-Сибирь» дьоруойдарыгар аналлаах стела, дьоруойдар ааттарын үйэтитэр мемориал уонна Ю.А. Гагарин бюһа.
Ржев аннынан охтубут Саха сирин буойуннарыгар аналлаах сквер
Эбийиэк Хабаров уул., 11 баар. Бырайыак быһыытынан бордюрдарынан уонна сиринэн күрүөлэммит курдары ааһыллар мемориальнай сквер баар буолуо. Территорията 3 зонаҕа арахсыа: Охлопков, Петухов уонна Пааматынньык зоната. Зоналары хронология истиэнэтэ холбуо.
Теплай күөл кытыла
Эбийиэк М.К. Аммосов аатынан Хотугулуу-Илиҥҥи федеральнай университет оройуонугар баар. Бырайыак быһыытынан дьон күөлгэ куттала суох түһэллэрин тэрийэргэ табыгастаах сири оҥоруу боппуруоһа көрүллэр. Ону тэҥэ куорат олохтоохторо, устудьуоннар сынньанар зоналара оҥоһуллуо: дьаарбайар маршруттар, аныгы архитектура технологиятынан кытылы тупсарыы баар буолуохтара.
Николай Щорс аатынан күөл кытыла
Щорс ааатынан күөл Дьокуускай Киин уокуругар Курашов аатынан уулуссаны кыйа сытар. Бырайыак эскииһинэн күөл кытылыгар сынньалаҥ миэстэлэр оҥоһуллуохтара, күөлү кыйа дьаарбайарга аналлаах сирдэр, пирстэр, күөлгэ түһүүлэр, массыына парковкалара, кафе баар буолуохтара.
Белэй күөл кытыла
Эбийиэк Гагаринскай уокурукка баар. Марха түөлбэтин Пилоттар уулуссаларын 2/1-ттэн саҕалаан хабар уонна Можайскай уулусса Маҕанныыр суолугар диэри учаастагар диэри салҕанар. Манна элбэх функциялаах уопсастыбаннай миэстэни тэрийии былааннананар. Бырайыак сүрүн идиэйэтэ – айылҕаны, историяны уонна аныгы инфраструктураны дьүөрэлии тутуу.
Тутааччылар сквердэрэ
Тутааччылар сквердэрэ Кальвица, Свердлов, Жорницкай уонна Пирогов аатынан уулуссалар быһа охсуһууларын киинигэр тутуллуо. Сатыы хаамааччылар зоналара аспаалланыа, күнтэн хаххалыырдаах ыскаамыйалар туруохтара, тутууну ойуулуур инсталляция баар буолуо, мастары олордон көҕөрдүү үлэтэ ыытыллыа.
Сэргэлээх күөл кытыла
Автодорожнай уокурук ДСК оройуонугар баар. Манна велопарковка, атыы-эргиэн павильоннара эбэтэр кафе, сибэккилээх ыскаамыйалар, хачыаллар, муоста көрүллүбүттэр. Ону тэҥэ көхтөөх сынньалаҥ зоната – скейтинг, волейбол, баскетбол, воркаут былаһааккалара, спордунан дьарыктанар, оҕо оонньуур миэстэлэрэ бааллар. Өйдөбүнньүк фонтана, амфитеатр, тыыны прокаттыыр павильон киллэриллибиттэр.
«Обнаженные сердца» сквер
Сквер Дьокуускай куорат Таалай күөлүн кытылыгар баар. Тутуулара саҥардыыны эбэтэр тосту уларыта тутууну эрэйэллэр. Бырайыак чэрчитинэн көхтөөх сынньалаҥы көҕүлүүр куттал суох буолуутун хааччыйар стандарка эппиэттиир, оҕо дьону үөрдэр саҥа оонньуур комплекстар оҥоһуллуохтара.
Куоластыыр сигэ: https://pos.gosuslugi.ru/lkp/fkgs/?location=m98701000&typeView=&typeView=1&type=&type=2
Хаартыска: Госуслуги порталтан
Сонуннар
Ордук ааҕаллар



