Куорат тупсаҕай эйгэтин бастыҥ бырайыагар куоластааҥ

Быйыл эбийиэктэри тупсаҕай көстүүлээх оҥоруу куоластааһыныгар Дьокуускай 8 уопсастыбаннай туонатын бырайыага киирдэ. Тупсарыллыахтаах эбийиэги талар куоластааһын – хас биирдии гражданиҥҥа олорор куоратын тас көстүүтүгэр тус сыһыанын көрдөрөрүгэр, кылаатын киллэрэригэр кыах.

Ол курдук, куорат олохтоохторо муус устар 21 күнүттэн бэс ыйын 12 күнүгэр диэри куоластааһыҥҥа кыттан, эйгэтин тупсаҕай оҥорууга тус кылаатын киллэрэр кыахтаах. Куоластааһын Госуслуги порталга аһыллан турар.

Дьэ, быйыл ханнык эбийиэктэргэ куоластыыбыт? Куоластыыр сигэ:

Юрий Алексеевич Гагарин аатынан сквер

Эбийиэк ханан баара, билиҥҥи туруга: Дьокуускай куорат Гагаринскай уокуругар, Можайскай аатынан уулуссаҕа баар. Сквертэн чугас 38-с, 24-с №№-дээх оскуолалар, «Незабудка» оҕо саада, Ю.А. Гагарин аатынан Култуура уонна аныгы искусство киинэ уонна «Оригинал» маҕаһыын бааллар. Суолу туораан биир бэлиэ уопсастыбаннай сиргэ – «Ворота Якутска» тиийиэххэ сөп. Сквер Дьокуускай аэропордуттан 500 м тэйиччи сиргэ турар.

Тупсарыы бырайыага: Сквер сынньанарга аналлаах, мемориальнай, дьаарбайар, оҕоҕо аналлаах уонна быыстапкалыыр сирдэрдээх буолуо. Билигин баар үс пааматынньык саҥардыллыа: «Аляска-Сибирь» дьоруойдарыгар аналлаах стела, дьоруойдар ааттарын үйэтитэр мемориал уонна Ю.А. Гагарин бюһа.

Ржев аннынан охтубут Саха сирин буойуннарыгар аналлаах сквер

Эбийиэк ханан баара, билиҥҥи туруга: Дьокуускай куорат Хабаров аатынан уулуссатын 11-рэ. Территорията 875 кв. м. иэни хабар. Манна билиҥҥитэ ыскаамыйалардаах, реклама билбордаах чуумпу зона баар. Сквер бырайыагын кэнсиэпсийэ: кэриэстээһин, сырдык уот уонна үйэлээх буолуу. 

Тупсарыы бырайыага: бырайыак 1941-1943 сс. Ржев аннынан кыргыһыы толоонугар охтубут Саха сирин буойуннарыгар ананар. Аҥаар эҥээрэ бордюрдарынан уонна сиринэн күрүөлэммит курдары ааһыллар мемориальнай сквер буолуо. Территорията 3 зонаҕа арахсыа: Охлопков, Петухов уонна Пааматынньык зоната. Зоналары хронология истиэнэтэ холбуо.

Теплай күөл кытыла

Эбийиэк ханан баара, билиҥҥи туруга: Күөл М.К. Аммосов аатынан Хотугулуу-Илиҥҥи федеральнай университет оройуонугар баар. Күөлгэ сайыҥҥы кэмҥэ үлэлиир фонтаннар оҥоһуллубуттар. Бу территорияҕа сыллата көстөр кыһалҕалар бааллар: хоруу истиэнэлэрин сааскы өттүгэр уу ылар, күөл соҕуруу эҥээригэр баар тротуардар ууга тимирэллэр, ону тэҥэ күөлү кыйа хаамарга табыгастаах сир суох. Сайыҥҥы кэмҥэ уута түһэр кэмнэрэ баар. Ол да үрдүнэн дьон күөл уутугар чугаһыы сатыыра куттал суох буолуутун тиэхиньикэтигэр эппиэттэспэт. Аҕыраадалар уонна тротуардар соччото суох туруктаахтар.

Тупсарыы бырайыага: Бырайыакка дьон күөлгэ куттала суох түһэллэрин тэрийэргэ табыгастаах сири оҥоруу боппуруоһа көрүллэр. Ону тэҥэ куорат олохтоохторо, устудьуоннар сынньанар зоналара оҥоһуллуо: дьаарбайар маршруттар, аныгы архитектура технологиятынан кытылы тупсарыы баар буолуохтара. 

Николай Щорс аатынан күөл кытыла

Эбийиэк ханан баара, билиҥҥи туруга: Щорс ааатынан күөл Дьокуускай Киин уокуругар, Курашов аатынан уулуссаны кыйа сытар. Күн бүгүн күөл кытыла биллэ мөлтөх туруктаах. Дьаарбайарга сорох сиринэн ыллыктар, айан уонна сатыы сылдьааччылар суолларын араарар аҕыраадалар суохтар, күөлгэ киирэргэ мөлтөх туруктаах биир эрэ түһүү сир баар. Ону тэҥэ сырдатыы уота тиийбэт, талаҕынан саба үүнүү баар.

Тупсарыы бырайыага: Куоластыырга көрдөрүллэр эскиз бырайыагынан, күөл кытылыгар сынньалаҥ миэстэлэр оҥоһуллуохтара, күөлү кыйа дьаарбайарга аналлаах сирдэр, пирстэр, күөлгэ түһүүлэр, массыына парковкалара, кафе баар буолуохтара.

Тутааччылар сквердэрэ

Эбийиэк ханан баара, билиҥҥи туруга: Тутааччылар сквердэрэ Кальвица, Свердлов, Жорницкай уонна Пирогов аатынан уулуссалар быһа охсуһууларын киинигэр тутуллуо. Билигин манна тупсаҕай көстүүттэн туох да суоҕун кэриэтэ: сатыы хаамыы зоналара, көҕөрдүү, массыына парковката суохтар. Манан сиэттэрэн бу территорияны тупсаҕай оҥоруу бырайыага оҥоһуллан турар.

Тупсарыы бырайыага: Тутааччылар сквердэрин бырайыагынан манна сатыы хаамааччылар зоналара аспаалланыа, күнтэн хаххалыырдаах ыскаамыйалар туруохтара, тутууну ойуулуур инсталляция баар буолуо, мастары олордон көҕөрдүү үлэтэ ыытыллыа.

Үрүҥ күөл кытыла

Эбийиэк ханан баара, билиҥҥи туруга: Эбийиэк Гагаринскай уокурукка баар. Марха түөлбэтин Пилоттар уулуссаларын 2/1-ттэн саҕалаан хабар уонна Можайскай уулусса Маҕанныыр суолугар диэри учаастагар диэри салҕанар.

Үрүҥ күөл – айылҕатынан уонна историяҕа суолтатынан, култуура да өттүнэн ураты сыаннастаах сир. Билигин баар тыас-уус, киртийии, дьыл кэминэн баар кыһалҕаларын аахсыбатахха, бу сир экологическай, туристическай хайысханан тупсар, сайдар кыахтаах. Сөптөөхтүк дьаһаннахха, бу туона Дьокуускай куорат айылҕаны, култуураны уонна аныгы технологияны сатабыллаахтык ситимниир биир ураты кэрэхсэбиллээх миэстэтинэн буолар кыахтаах.

Тупсарыы бырайыага: элбэх функциялаах уопсастыбаннай миэстэни тэрийии.  Бырайыак сүрүн идиэйэтэ айылҕаны, историяны уонна аныгы инфраструктураны дьүөрэлии тутуу.

Сэргэлээх күөл кытыла

Эбийиэк ханан баара, билиҥҥи туруга: Автодорожнай уокурук ДСК оройуонугар баар. Бу оройуоҥҥа олохтоох дьон элбэҕин үрдүнэн, тупсарыы үлэтэ суоҕун кэриэтэ. Күөл кытылыгар бөҕөргөтүү үлэтэ, уотунан сырдатыы суох, көҥүллэммэтэх күөлгэ түһэр сирдэрдээх. Чугаһынан 3 оҕо саада, 6-с №-дээх оскуола бааллар, саҥа «Звезднай» түөлбэ тутуллар.

Тупсарыы бырайыага: Бырайыак эскииһинэн манна велопарковка, атыы-эргиэн павильоннара эбэтэр кафе, сибэккилээх ыскаамыйалар, хачыаллар, муоста көрүллүбүттэр. Ону тэҥэ көхтөөх сынньалаҥ зоната – скейтинг, волейбол, баскетбол, воркаут былаһааккалара, спордунан дьарыктанар, оҕо оонньуур миэстэлэрэ бааллар. Өйдөбүнньүк фонтана, амфитеатр, тыыны прокаттыыр павильон киллэриллибиттэр.

«Обнаженные сердца» сквер

Эбийиэк ханан баара, билиҥҥи туруга: «Обнаженные сердца» сквер Дьокуускай куорат Таалай күөлүн кытылыгар баар. Дьон-сэргэ сынньанарыгар аналлаах тутуу куорат инфраструктуратын тапталы, сомоҕолоһууну уонна өйдөһүүнү бэлиэтиир биир дьоһун уопсастыбаннай миэстэтинэн буолар. Хомойуох иһин, сквер билиҥҥи туруга кэккэ итэҕэстэрдээҕэ бэлиэтэнэр. Ол курдук, оҕо оонньууругар анаммыт үгүс тутуу эргэрэн, хапытаалынай өрөмүөн ыытыллара ирдэнэр. Бу туонаны тупсарыы кини ураты тыынын, кэрэхсэбиллээх көстүүтүн биллэ сэргэхситиэ.

Тупсарыы бырайыага: Билигин баар сквер тутуулара саҥардыыны эбэтэр тосту уларыта тутууну эрэйэллэр. Бырайыак чэрчитинэн көхтөөх сынньалаҥы көҕүлүүр куттал суох буолуутун хааччыйар стандарка эппиэттиир, оҕо дьону үөрдэр саҥа оонньуур комплекстар оҥоһуллуохтара.

Хаартыскалар: Госуслуги порталтан