Куорат таһынааҕы дьиэлэри нэһилиэнньэҕэ босхо биэриэхтэрин баҕараллар

Арассыыйа олохтоохторугар тыа сиригэр, ыраах сытар нэһилиэнньэлээх пууннарга баар дьиэни чөлүгэр түһэрэр уонна онно олохсуйар усулуобуйаҕа босхо биэрэргэ этии киллэрдилэр. Этии эргэ-урба, тыа сирин быраҕыллыбыт дьиэлэригэр сыһыаннаах. Ааптардар толкуйдарынан, маннык тутуулары ылбыт дьон дьиэни өрөмүөннүүр уонна онно бастайааннай өрүккэ олорор эбээһинэстэнэллэр.

«Тыа сирин нэһилиэнньэлээх пууннарыгар быраҕыллыбыт биирдиилээн олорор дьиэлэри чөлүгэр түһэрэр эбэһээтэлистибэлээх гражданин сайабылыанньатыгар олоҕуран, бас билиигэ уонна туһаныыга биэриини мэктиэлиир сокуон механизмын киллэрии оруннаах», — диэн көҕүлээччилэр эттилэр.

Парламентарийдар бэлиэтииллэринэн, бырагыраама муниципалитет бас билиитигэр сылдьар уонна иччитэх дьиэлэргэ эрэ сыһыаннаах буолуоҕа. Үчүгэй хаһаайыннаах, нэһилиэстибэнэн бэриллибит эбэтэр быстах кэмҥэ олорор дьоно суох эбийиэктэр бу көҕүлээһиҥҥэ хапсыбаттар.

Көҕүлээһин ааптардара бу дьаһал муниципалитеттарга быраҕыллыбыт дьиэлэри көрүүгэ-харайыыга уонна көтүрүүгэ, ону тэҥэ олорор дьиэ пуондатын чөлүгэр түһэриигэ ороскуоту аччатыа дии саныыллар. Маны таһынан, бу ньыма гражданнары тыа сирин сайыннарыыга уонна олохсуйа кэлэргэ көҕүлүө диэн, РИА Сонуннара иһитиннэрэр.