Куорат сөтүөлүүр сирин кэҥэтэр сорук турар
Бүгүн куорат баһылыга Евгений Григорьев «Россия 24» ханаал «Прямой эфир с городом» биэриитигэр ыалдьыттаата. Быһа эпииргэ баһылык бу иннинэ өрөмүөннэнэн бүппүт куорат сөтүөлүүр сирин олохтоохтор үчүгэйинэн сыаналаабыттарын, бэс ыйын 9 күнүгэр аһыллыбыт пляжка дьон-сэргэ тоҕуоруһа мустарын бэлиэтээтэ.
«203-с түөлбэҕэ сөтүөлүүр сир тэриллиэ дуо?» диэн ыйытыыга Евгений Николаевич бу курдук хоруйдаата:
– Дьокуускай куорат нэһилиэнньэтин ахсаана сыл аайы элбии турар. Биллэн турар, 202-с түөлбэни эрэ хабар сөтүөлүүр сир кыараҕаһа чуолкай. Онон куорат пляһын кэҥэтэр сорук күүскэ турар, быһаарыныы хайыы үйэ ылыллыбыта. Кэнэҕэски сылларга 203-с түөлбэ өттүттэн “Паруса” олорор комплекска диэри, оттон Роман Дмитриев аатынан кытыл өттүттэн оҥочо станциятыгар диэри территория тупсарыллыаҕа. Кыһын биэрэги оҥорорго өрүс кумаҕын таһыы, сыыйа-баайа күрүөлэри туруоруу үлэтэ ыытыллыаҕа.
Маны таһынан, куорат баһылыга пляжка чааһынай тэрилтэ төгүрүк суукка бэрээдэги көрөрүн-истэрин, видеонан кэтээн көрүү үлэлиирин кэпсээтэ. Кэнники кэмҥэ куорат сөтүөлүүр сиригэр итирик туруктаах эбэтэр аһыы утаҕы испит киһи биллэ аҕыйаабытын бэлиэтээтэ.
Сонуннар
Ордук ааҕаллар
