Куорат полигонугар умайыы суох

Кэнники күннэргэ Дьокуускай куоракка салгыҥҥа кэҥсик, хабархай, аһыы сыт баар буолла диэн үҥсүүлэр  киирэллэрин туһунан Дьокуускай куорат Олохтоох дьаһалтатын уочараттаах планеркатыгар иһитиннэрэн тураллар.

Нэһилиэнньэни аймаабыт куһаҕан сыт хантан тарҕанарын быһаарарга дьаһал ылыллан, олунньу 18 күнүгэр "Жилкомсервис" МУТ дириэктэрэ Юрий Спиридонов суруналыыстары кытта  кытаанах бөҕү харайар полигоҥҥа тахса сырыттылар. 
Юрий Афанасьевич иһитиннэрбитинэн, бөҕү тоҕор полигоҥҥа баһаар бүтэһигин балтараа сыл анараа өттүгэр буолбут. Урукку кэмҥэ манна сылга 3-4-тэ уот турар  буоллаҕына, кэлин бөҕү харайыыга киллэрбит уларытыылара көдьүүстээҕин көрдөрбүт.

Манна даҕатан эттэххэ, куорат баһылыга Евгений Григорьев соторутааҕыта уокуруктар уонна нэһилиэктэр управаларын салайааччыларын кытта куорат биир сытыы кыһалҕатын – санитарнай туочукалар нуорманы таһынан туолууларын дьүүллэһэн турар. 
Кэпсэтиигэ «Якутскэкосети» уонна «Жилкомсервис» тэрилтэлэр салайааччылара ыҥырыллан, 
элбэх кыбартыыралаах олорор дьиэлэр, чааһынай да кыбаарталлар бөх тоҕор дьааһыктарыгар, холобур, оҕуруот аһын атыылыыр дьоҕус киоскалар  хоруопкаларын быраҕалларын түмүгэр ТКО иэнэ нуорманы таһынан барарын, түмүккэ тиэйии өҥөтүн төлөбүрэ дьиэни бас билээччилэр хармааннарыгар охсорун бохсор сыалтан 2025 сылга эбии 20 кэтээн көрүү камератын  туруорар туһунан быһаарыы ылыллыбыта.

Санатар буоллахха, Бүлүүлүүр суол 9 км баар бөх тиэйэр полигон чааһынайдартан 1,5 куб. м диэри иэннээх бөҕү босхо тутар. Бу  миэрэ, бастатан туран, куорат территориятыгар уонна ойуурга көҥүлэ суох сыбаалкалар ахсааннарын аҕыйатар сыаллаах. Манна даҕатан эттэххэ, Бүлүүлүүр тракт 27 км тутуллар саҥа полигон 2028 сылга үлэҕэ киириэхтээх.