Сөтүө сезона сабылынна, ол эрээри пляж сынньанарга, спордунан дьарыктанарга аһаҕас

Ол туһунан “Эхо столицы” эрэдээксийэтигэр пляж дириэктэрэ Виктор Омуков кэпсээтэ:

- Бэнидиэнньиктэн сөтүөлүүр зоналар үлэлээбэттэр. Сөтүө көҥүллэммэтин туһунан биллэриилэри ыйаатыбыт.

Бэс ыйын 8 күнүттэн уопсайа 63 суукканы эргиччи үлэлээтибит. Онон сезон үчүгэйдик ааста дии санаатыбыт. Бастатан туран, сэрэхтээх буолууну, санитарнай туругу уонна дьон сынньанарыгар табыгастаах усулуобуйаны олохтуурга дьулуһабыт. Пляжка быыһыыр уонна санитарнай сулууспалар, хомунаалынай хаһаайыстыба үлэһиттэрэ үлэлээтилэр.

Бэлиэтээн эттэххэ, сезон устата киһи өлүүтэ, дьоҥҥо материальнай хоромньу тахсыбата. Быраас бастакы көмөтүгэр биирдиилээн наадыйааччылар, ууга тимирэн эрэр дьону өрүһүйүү, суһал көмөнү ыҥырыы бааллара. Бэрээдэги кэһээччилэри, чуолаан аһыы утаҕы испит дьону кытта, улахан үлэ ыытылынна.

Хас да култуурунай-маассабай тэрээһиннэри ыыттыбыт: дьаарбаҥкалары, аһаҕас эрчиллиилэри, пляж волейболугар, мас тардыһыыга чемпионаттары, кэнсиэртэри, йога дьарыктары. Дьону чөл олоххо, спорка угуйууга кыһалла сатаатыбыт.

Бэлиэтээн эттэххэ, сөтүө тохтообутун да кэннэ, пляж сирэ-уота дьон сынньанарыгар, спордунан дьарыктанарыгар аһаҕас.