Куорат орто үөрэхтээһинин бэтэрээннэрин бырайыактара

Оскуола саҕаттан ылсыспыт дьыалаларыгар бэриниилээх, олохторун тухары атыттарга холобур буола турар дьон баар буолаллар. Туох да дирбиэнэ-дарбаана суох, баар кыһалҕаны көрөн олорбокко, олох кыһалҕаларыгар бэриммэккэ, тугу кыайалларынан, туппуттарын ыһыктыбакка, куруук дьон ортотугар сырдыгы-кэрэни тарҕата сылдьалларыттан тулалыыр эйгэбит тупсар. Оннук киһинэн куораппыт олохтооҕо, РФ профтехүөрэхтээһинин туйгуна, үөрэҕирии эйгэтин бочуоттаах бэтэрээнэ Анна Афанасьевна Никифорова (Колодезникова) буолар.

2016 с. Дьокуускайга «Азия оҕолоро» норуоттар икки ардыларынааҕы  спортивнай оонньууларга бэлэмнэнии үгэннээн турар кэмигэр киин куораппытыгар үлэ күөстүү оргуйбута. Ити кэмҥэ оччолорго Технологическай колледж таһыгар куорат иһинээҕи орто анал үөрэхтээһиҥҥэ олохторун анаабыт бэтэрээннэргэ аналлаах искибиэр наада диэн А.А. Никифорова көҕүлээһининэн, Строительнай уокурук управатыттан Е.Н. Степановалыын колледж дириэктэрэ А.М. Бессмертный  сөбүлэҥинэн, дьокутааттар өйөөннөр от ыйыттан тэрээһин үлэтэ саҕаламмыта. Устудьуоннар көмөлөрүнэн искибиэр туруохтаах сирин ыраастааннар, уокурук дьаһалтата КамАЗ массыынанан кумах куттаран, уулаах, бадараан сирин көннөрөн, кулуумба оҥороннор, бэтэрээннэр сибэкки олордуутун саҕалаабыттара.

Ити сыл балаҕан ыйын 16 күнүгэр куорат иһинээҕи орто анал үөрэхтээһин тэрилтэлэрин бэтэрээннэрэ ытык кырдьаҕастар Иннокентий Петрович Заморщиков, Ирина Трифоновна Голина кыттыылаах сквер үөрүүлээх аһыллыыта буолбута. Устудьуоннар көмөлөрүнэн 40-ча бузина, акация, сирень, яблоня, долохоно, хатыҥ мастары олордубуттара.

Дьэ, ити күнтэн ыла саас аайы бэс ыйын 5 күнүгэр – Аан дойдутааҕы айылҕа харыстабылын күнүгэр, уокурук бэтэрээннэрэ мустан сибэкки, мас олордоллоро үгэскэ кубулуйбута онус сылыгар барда. Ону бастакы сыллартан Анна Афанасьевна кэргэнэ РСФСР профтехүөрэхтээһинин туйгуна, элбэх анал бэлиэ хаһаайына Михаил Гаврильевич Никифоровтыын, сиэннэриниин, дьиэ кэргэнинэн күһүн устудьуоннар кэлиэхтэригэр диэри көрөллөр-истэллэр. Маныаха Анна Афанасьевна идэтинэн биолог буолара быһаарар оруолу ыллаҕа.

Билигин искибиэргэ эти-хааны эрчийэр тренажердарга сааһын-сайынын бэтэрээннэр дьарыктаналлар. Бу үтүө дьыаланы өйөөбүт дьону ааттаан ааһар тоҕоостоох: уокурук салалтатыттан анал байыаннай дьайыыга олоҕун толук уурбут Савва Анатольевич Михайлов сэттэ яблоняны тиэйэн аҕалан олордууга көмө оҥорбута умнуллубат; В.В. Рязанскай, А.В. Петров, Р.М.  Заболоцкая – уокурук управатыттан, Н.И. Холмогорова – үөрэхтээһин уонна наука министиэристибэтин, бэтэрээннэрин сүбэтиттэн дьону түмэргэ күүс-көмө буолбуттара. Үөрэҕирии үтүөлээх үлэһиттэрэ М.М. Максимов, П.П. Сергеев, Ю.Ф. Федоров даачаларыттан уонна атыылаһан аҕалан мас олордубуттара, В.И. Мартынов  бэйэтин массыынатынан 11 хатыҥы аҕалан олордон, махтал суругунан бэлиэтэммитэ.

Улуу Кыайыы 80 сылынан эбии 35 маһы олордон, аллея оҥорбуттар. Оттон күһүн, Арассыыйаҕа профтехүөрэхтээһин 85 cылынан бэтэрээннэр мас олордон, итии чэй тула сэһэргэһэн, наҕараада тутан, уруккуну-хойуккуну санаһан, инники былааннарын торумнаһан тарҕаспыттара. Маныаха тэрээһиҥҥэ Белинскэй аатынан уонна харахтарынан мөлтөхтүк көрөөччүлэр социальнай  библиотекаларын үлэһиттэрэ күүс-көмө буолбуттар.

Салгыы сиэмэнэн отонноох сэдэх мастары олордон тарҕатар саҥа кэскиллээх хайысханы Анна Афанасьевна салалтатынан колледж эдэр үлэһитэ С.Н. Демьянова устудьуоннарыныын саҕалаан эрэллэрэ кэрэхсэнэр. Быйыл олордуу мастарыгар  сыыс от үүммэтин, сиигин туттун диэн, хатырыгынан өҥнөөн ландшафтнай дизайннаан балачча үлэни үлэлээбиттэр.

2026 с. искибиэр тэриллибитэ 10 сылын туолар. Бэтэрээннэр инники былааннара элбэх – уу олохсуйбут сиригэр эбии буор куттаран, хаамар суол, о.д.а. киһи мустан сынньанарыгар сөптөөх усулуобуйа тэриллиэн баҕараллар. Ханна да буоларын курдук, дьыала олоххо киириитэ үптэн-харчыттан тутулуктаах. Аҥаардас үтүө дьыалаҕа эрэнии кэрэгэйэ искибиэр уопсай көстүүтүгэр дьайара биллэр.

Онуоха бэтэрээннэрбитигэр, Анна Афанасьевна салалтатынан инники өттүгэр олохтоох көҕүлээһиннэри өйүүр бырагыраама күрэҕэр киирсэллэригэр, үөһэттэн өйөнөн, бырайыактара үбүлэнэн олоххо киирэригэр баҕарыаҕыҥ.