Куорат оптуобустарыгар суоппар тиийбэт

«Якутия 24» тэлэбиидэнньэ ханаалын «Якутия в деталях» биэриитигэр Дьокуускай куорат уопсастыбаннай тырааныспарын сытыы кыһалҕаларын дьүүллэстилэр. 
Ол курдук, «Союз Авто» чааһынай тиэйээччи салайааччыта Андрей Косицкай куорат оптуобустарыгар 180 кэриҥэ суоппар тиийбэтин ыйда.
«Оптуобус суоппара күн аайы үлэлиирэ табыллыбат. Икки күн үлэлээн баран, булгуччу сынньаныахтаах. Оттон ол сынньанар кэмигэр кинини атын суоппар солбуйуохтаах. Ол эбэтэр биһиэхэ биир оптуобуска иккилии суоппар тиийбэт. Хамнас кээмэйэ бүгүҥҥү күҥҥэ 80 тыһ. солк. 150 тыһ. солк. диэри халбаҥныыр», – диэтэ Андрей Косицкай.
Муниципальнай тиэйээччигэ эмиэ суоппар тиийбэтинэн, Д категорията суохтары босхо үөрэтэллэр, диэн Олохтоох дьаһалта пресс-сулууспата иһитиннэрэрэ.
Санатар буоллахха, ааспыт сыл саҥатыгар Куораттааҕы суол-тырааныспар сулууспатын салайааччыта Эдуард Садовников «Киин куоракка» интервьютугар суоппар тиийбэтин куорат уопсастыбаннай тырааныспарын биир сытыы кыһалҕата буоларын этэн турар. 
«...“Д” категориялаах суоппары булуохтааҕар, солбуйар да уустук. Холобур, ким эрэ ыарыйдаҕына, тиэхиньикэ алдьаннаҕына. Олоххо араас буолар. Чааһынай тиэйээччилэр суоппардара оптуобустарын бэйэлэрэ көрүнэллэр, өрөмүөннэнэллэр. Линияҕа тахсан баран аара суолга алдьанар түгэннэрэ да үгүс. Холобур, бу кыһын биир суоппар оһоҕо алдьанан моһуогурбут, ол эрээри тиэйэн испит дьонун тиһэх тохтобулга диэри илдьибит. Ону “Оһоҕун арааран кэбистэ” диэн үҥсүү киирбитэ. Бачча тымныыга хайа суоппар оһоҕун араарыай? Биһиги кыһыммытын, бэл, тиэхиньикэ тулуйбат…» – диэн турар Эдуард Садовников. 
Кини итини таһынан чааһынай тиэйээччилэргэ анаан социальнай мэктиэ нуорма-быраап аакталара оҥоһулларын ыйбыта. Онно, бастатан туран, санаторийга, курорка эмтэнии, “Д” категорияҕа босхо үөрэх, биир кэлим пуорманан хааччыйыы, үлэлиир кэмнэригэр ипотекаларын ыйдааҕы төлөбүрүгэр көмө буолар субсидия, чааһынай уһуйааннарга оҕолоругар босхо миэстэ, дьиэ-уот кыһалҕатын быһаарар суоллары тобулуу киирэллэрин бэлиэтээбитэ.