Куорат олохтоохторо өссө ханна ыһыахтыахтарын сөбүй?

Улуу Туймаада хочотун ыһыаҕа буолара 10 хонук хаалла. Ол күҥҥэ ханнык эмэ төрүөтүнэн сылдьар кыах суох, эбэтэр Үс Хатыҥҥа айанныыры ыарырҕатар, эбэтэр атын дойду сиэрин-туомун билсэр баҕалаах буоллахха, нэһилиэктэр ыһыахтарыгар ыалдьыттыахха сөп. Ол курдук, куорат нэһилиэктэрин ыһыаҕа бу өрөбүллэргэ, бэс ыйын 20, 21 күннэригэр, былааннанар.

Хатас ыһыаҕа

Буолар күнэ – бэс ыйын 20 күнэ (субуота)

Буолар сирэ – Ойуу Хатыҥ

Ыһыах сарсыарда 09.30 чаастан саҕаланар. Ыһыах аһыллыытын «Саха сирэ – сир сүрэҕэ» сүрүн сиэрэ-туома күнүс 11.00 чаастан былааннанар. Бырагыраамаҕа «Аҕас-балыс», «Уһун суһуох» кыргыттарга күрэхтэр, «Баҕарах бөҕөстөрө», «Өбүгэ оонньуулара» күүстээхтэр, «Эрдьигэн Бэртэр» оҕолорго күрэхтэр, «Ыһыаҕым талба таҥаһа» таҥас күрэҕэ о.д.а. киирбиттэр.

Ыһыах 18.00 чааска Аан Алахчын Хотуҥҥа махтаныы сиэринэн-туомунан түмүктэнэр.

*Хатаска Дьокуускай автовокзалыттан 103 №-дээх оптуобус сылдьар.

Маҕан ыһыаҕа

Буолар күнэ – бэс ыйын 20 күнэ (субуота)

Буолар сирэ – Сөрүүн күөл

Ыһыах сарсыарда 11.00 чаастан Олоҥхо дойдутун  алгыһа» тэрээһинтэн саҕаланар. 12.00 чаастан ыһыаҕы арыйыы сиэрэ-туома, оһуохай күүтэр. 13.00 чаастан утум-ситим бырааһынньыктааҕы кэнсиэр, Арассыыйа норуоттарын төрүт таҥастарын күрэҕэ, кэрэ аҥаардарга уһун суһуох күрэҕэ, оҕолорго уонна улахан дьоҥҥо тус-туһунан спортивнай оонньуулар ыытыллыахтара. Киэһэ 21.00 чаастан киэһээҥҥи бырагыраама буоларын биллэрэллэр.

*Маҕаҥҥа Дьокуускай автовокзалыттан 102 №-дээх оптуобус сылдьар.

Тулагы Киллэм ыһыаҕа

Буолар күнэ – бэс ыйын 21 күнэ (өрөбүл)

Буолар сирэ – Тулагы сыһыыта

Ыһыах сарсыарда 09.00 чаастан Аан Алахчын Хотуҥҥа сүгүрүйүү сиэриттэн-туомуттан саҕаланар. Ыһыаҕы арыйыы сиэрэ-туома күнүс 12.00 чаастан саҕаланар. Ол кэннэ тута Оһуохай күрэҕэ былааннанар. «Түмэн» уус-уран оҥоһуктар дьиэлэрин маастардара бу күн бэйэлэрин оҥоһуктарын сэргэ «Эллэй Боотур» уонна Тулагы Киллэм нэһилиэгин панноларын сүрэхтииллэрэ күүтүллэр. Бырагыраамаҕа итини таһынан «Чугдаарар оҕо саас» оҕолорго күрэх, эҕэрдэ кэнсиэр, «Оһуор-мандар түһүлгэтэ» дьиэ кэргэнинэн Арассыыйа норуоттарын таҥаһын күрэҕэ, о.д.а. бааллар. Ыһыах 17.00 чааска Аан Алахчын Хотуҥҥа сүгүрүйүү сиэринэн-туомунан түмүктэниэҕэ.

*Тулагыга Дьокуускай автовокзалыттан 104 уонна 105 №№-дээх оптуобустарынан тиийиэххэ сөп. 

Ыһыах алгыһыгар тиксиҥ! Үрдүкү Айыылар арчылаары-араҥаччылаары тиксэр күннэрин мүлчү тутумаҥ! Этэҥҥэ буолуҥ!