Куорат олохтоохторо бырабыыталыстыба үлэтин үчүгэйинэн сыаналаатылар

Кулун тутар 6 күнүгэр Ю.А. Гагарин аатынан Аныгы култуура уонна искусство киинигэр СӨ Бырабыыталыстыбатын Дьокуускай куорат нэһилиэнньэтигэр отчуота буолан ааста. Отчуоту Бырабыыталыстыба Бэрэссэдээтэлэ Кирилл Бычков оҥордо.
Кирилл Бычков бэлиэтээбитинэн, маннык отчуоттар нэһилиэнньэҕэ дойду иннигэр турар соруктары тиэрдэргэ көмөлөһөллөр.
Отчуокка куорат баһылыга Евгений Григорьев кыттан, куорат бары уокуруктарыгар уонна нэһилиэктэригэр 33 отчуот буолан ааспытын бэлиэтээтэ.
«2024 сылынан кэккэ нацбырайыактар түмүктэннилэр. Ил Дархан Айсен Николаев уонна Бырабыыталыстыба Бэрэссэдээтэлэ Кирилл Бычков өйөбүллэринэн Дьокуускай куорат үчүгэй түмүктэри көрдөрдө. Сүүһүнэн килэмиэтир суол тутуллуута, тыһыынчанан киһи саҥа дьиэлэниитэ, уонунан социальнай эбийиэк үлэҕэ киириитэ нэһилиэнньэ олоҕун уйгутун тупсарар. Ыытыллар үлэ барыта дойду баһылыга Владимир Путин өйөбүлүн ылбыт маастар-былааҥҥа киирбитэ. 2030 сылга диэри нэһилиэнньэ олоҕун тупсарар аналлаах 90 бырайыагы олоххо киллэриэхтээхпит», - диэтэ Евгений Григорьев.

Бырабыыталыстыба Бэрэссэдээтэлэ Кирилл Бычков 2024 сыл Арассыыйаҕа биллэриллибит Дьиэ кэргэн уонна Саха Өрөспүүбүлүкэтигэр Оҕо саас сылларын чэрчитинэн ааспытын, Арассыыйа Бэрэсидьиэнин быыбара, VIII-с «Азия оҕолоро» НИСО ыытыллыбытын бэлиэтээтэ. Маны сэргэ 13 нацбырайыак үлэлээбитин, Ил Дархан 9 стратегическай ыйааҕын олоххо киллэрии ыытыллыбытын санатта, Дьокуускайга Онкологияны эмтиир балыыһа тутуллубутун, Өлүөнэ күргэтин тутуу саҕаламмытын ыйда.  
Нацбырайыактары олоххо киллэрии иитинэн Саха сиригэр 2019-2024 сылларга 26 оҕо саада (3114 миэстэ), 28 оскуола (8825 миэстэ), 8 култуура, 76 доруобуйа харыстабылын, 8 спорт эбийиэктэрэ үлэҕэ киирдилэр, 1200 км усталаах суол өрөмүөннэннэ, 3559 тыһ. кв. м. иэннээх олорор дьиэ тутулунна.
2025 сылтан 12 федеральнай бырайыак иитинэн 43 өрөспүүбүлүкэ таһымнах бырайыак олоххо киириэҕэ. 

Арассыыйаҕа Аҕа дойдуну араҥаччылааччы, Саха сиригэр Ийэ дойдуну көмүскээччи сылларынан биллэриллибит 2025 сыл устата ыччаты патриотическай иитиигэ, бэтэрээннэргэ уонна анал байыаннай дьайыы кыттыылаахтарыгар өйөбүл миэрэлэрин оҥорууга аналлаах тэрээһиннэр ыытыллыахтара, сыл сүрүн тэрээһининэн Улуу Кыайыы 80 сылын бэлиэтээһин буолуоҕа.
Отчуоту истэн баран олохтоохтор хаарбах уонна саахалланар туруктаах дьиэлэртэн көһөрүү, маневреннай дьиэ-уот пуондатын кэҥэтии, Ю.А. Гагарин аатынан сквер өрөмүөнүн, Сайсары күөл экологиятын тупсарыы, Матчитов уонна Газовиктар уулуссаларын өрөмүөнүн, Объездной шоссе эргин уу турбатын тардыы о.д.а туһунан ыйыталастылар. Киирбит этиилэр, ыйытыылар бары боротокуолга киллэрилиннилэр, диэн Олохтоох дьаһалта пресс-сулууспата иһитиннэрэр.