Куорат олохтооҕун кодексатын ылыныы бэлиэ күнүгэр

«Наш Якутск» бэстибээл түмүктүүр тэрээһинигэр Ю.А. Гагарин аатынан Култуура уонна аныгы искусство киинигэр Дьокуускай куорат олохтооҕун кодексатын ылыныы буолла.

Дьокуускай куорат олохтооҕун кодексатын көҕүлээччинэн куорат уопсастыбаннай палаататын бэрэссэдээтэлэ Андрей Высоких буолар. Үөрүүлээх чааска кини илии баттаан бигэргэппитин кэнниттэн сыанаҕа «Дьокуускай куорат дьахталларын лигата» тахсан баттаатылар. Онтон оскуола үөрэнээччилэриттэн саҕалаан ытык кырдьаҕастарга тиийэ мустубут дьон бука бары уһун уочаракка турдулар.

Кинилэри кытта биирдиилээн кэпсэттэххэ, үлэ тэрилтэлэриттэн, оскуола кылаастарын төрөппүттэрин аатыттан уонна бэйэлэрэ баҕа өттүнэн кэлбит элбэх.

Анна, төрөппүт:

– Мин оҕом үөрэнэр кылааһыттан бэрэстэбиитэл быһыытынан кэллим. Биһиги оҕолорбут оскуола саастарыттан маннык Кодекс баарын билэ улааттахтарына, уопсастыбаннай миэстэҕэ тутта-хапта сылдьалларыгар улахан олугу ууруо диэн эрэнэбин.

Николай, куорат олохтооҕо:

– Мин бу историческай түгэҥҥэ куорат олохтооҕо буоларым быһыытынан кытынным. Илии баттааһын көхтөөхтүк бара турарыттан үөрдүм. Бу бэлиэ күҥҥэ кыттыыны ыларбыттан дуоһуйдум.

«Дьокуускай куорат олохтооҕун кодексата» хас биирдии киһиэхэ уопсастыбаннай миэстэҕэ, тырааныспарга, уулуссаҕа, маассабай тэрээһиннэргэ, куораппыт күннээҕи олоҕор, киһи киһиэхэ сыһыаныгар көмөлөөх буолуо диэн эрэллээхпит.

Хаартыскалар: Ааптар түһэриилэрэ