«Куорат олохтооҕун кодексата» ылыллыбыта эрэли сахта

«Куорат олохтооҕун кодексата» ылыллыбытын истибиччэ, тус көрүүбүн, этиибин үллэстиэхпин баҕардым.

Дьон куоратын чахчы да таптыырын – ыраастык, чэбэрдик тутта, оҥоһуллубуту харыстыы сылдьар буоларын туһугар туох хайа иннинэ өй-санаа төрдүттэн уларыйыан наада. Оттон ону, этэргэ дылы, кырачаан оҕо өйүн тутар, «мин» дэнэр сааһыттан саҕалаан ситиһиэххэ сөп. Ол аата төрөппүт, эһэ-эбэ дьон иитиитэ манна быһаарар оруоллаах. Ол иитиини иилэ хабан ылан, уһуйааннар, оскуолалар салгыы сайыннарыахтаахтар.

Оттон күдээринэ, бэйэтэ да куоратын таптыыр, улахан, өйдөрүн туппут дьон, Кодексаҕа сэттэтэ да илии баттаатахтарына, арыыланан хаалбыт араҥа алдьаппытын курдук алдьата, киртиппитин курдук киртитэ сылдьара чуолкай.

Холобур, истэр былаһын тухары – хаарыан сыранан, үлүгэрдээх үбүнэн тутуллубут сылаас тохтобуллары кимэ биллибэт дьон, ол иһигэр оскуола үөрэнээччилэрэ алдьаппыт, урусхаллаабыт буолаллар. Тутуллубут буруйдаах оҕолорго кылаас салайааччылара, үөрэх кыһатын салалтата, төрөппүттэр өйдөтөр үлэни төһө ыыталларый? «Бу сыыһа, маннык буолуо суохтаах» диэн сэбиэскэй кэм саҕана пионердар, хомсомуоллар курдук мунньахтыыллар, кылаас иннигэр таһааран дьүүллүүллэр дуо? Тоҕо эрэ оннугу истибэппин.

Уһуйаан оҕолоруттан саҕалаан ийэ айылҕаны, төрөөбүт сири, бөһүөлэги, саастаах дьону таптыы, ытыктыы үөрэтэргэ ураты болҕомто ууруллуохтаах. Иитээччилэргэ бырагыраама, бырайыак бэлэмнэтэн, куонкурус да ыытан туран, бастыҥтан бастыҥы талан, киэҥник тарҕатыахха сөп. Онно эбии иитэр-үөрэтэр ис хоһоонноох ойуулуктар, остуоруйалар өссө элбиэхтэрин, суруллуохтарын наада. Ол аата айар үлэһиттэр эмиэ кыттыахтаахтар.

Үтүө санааҕа, дьоҥҥо болҕомтолоох буолары көҕүлүүр тэттик устуулары киин сир блогердара хамаҕатык таһааралларын хайгыы көрөбүн. Кыаммат дьоҥҥо көмөлөһөллөр, саастаах кырдьаҕастарга ас нобуора, таҥас да ылан бэлэхтииллэр. Атын омуктарга эмиэ оннук ис хоһоонноох устуу элбэх. Оттон биһиэннэрин киэнин көрдөххө, барыта кэриэтэ атыы-тутуу рекламата, мээнэ-мээнэ чабыланыы, «уруһуй» олоҕу көрдөрүү. «Харчы таҥаратын» өрө тутуу. Оттон суобас, дууһа өйдөбүлэ ханна эрэ «муннукка ытыыр».

«Куорат олохтооҕун кодексата» ылыллыбыта эрэли сахта. Манна олоҕуран, уопсастыбаннас бүттүүнэ туруннаҕына, түмүк биллэн барыа этэ.