Куорат олохтооҕун кодексата — кэм ирдэбилэ

Ол курдук, Олохтоох дьаһалта бу нэдиэлэтээҕи былаанныыр мунньаҕар куорат Уопсастыбаннай палаататын бэрэссэдээтэлэ Андрей Высоких «Куорат олохтооҕун кодексата» диэн хас биирдии киһи бэйэ бодотун тардына сылдьарыгар аналлаах быраабылалары оҥорорго этии киллэрдэ.

Андрей Высоких бэлиэтээбитинэн, итинник быраабылалары уопсастыбанньыктар бэйэлэрэ суруйуохтарын сөп. «Ааспыт субуотаҕа өссө биир тохтобулу урусхаллаатылар. Бу — соҕотох түбэлтэ буолбатах. Кэлиҥҥи кэмҥэ нэдиэлэ аайы маннык быһылаан тахсар буолла. Ыскамыайкалары күөлгэ тамныыллара ол суох, ууруналары алдьаталлара ол суох, силлииллэрэ-хаахтыыллара ол суох», — диэтэ кини.

Андрей Высоких:

— Нэһилиэнньэ култуурата быстар намтааһына, атын дьон кыһалҕатыгар тыйыс сыһыан, дьон үлэтин сыаналаабат буолуу баар буолла. Онон куорат олохтоохторугар тугу гынар сатамматын уонна сатанарын быһаарар уопсастыбаннай дуогабар курдугу түһэрсэр кэм ирдэбилэ буолла.

Куорат дьаһалтата бу этиини өйөөн туран, нэһилиэнньэни «Куорат олохтооҕун кодексатын» оҥорорго көхтөөх кыттыыны ыларга ыҥырар, диэн Олохтоох дьаһалта пресс-сулууспата иһитиннэрэр.