Куорат оҕото уонна талах олоппос

Намтан, Мэҥэттэн, Төҥүлүттэн, Хатастан уус ымпыгын-чымпыгын киниттэн билбиттэр аҕыйаҕа суохтар. Оттон куорат оскуолаларын үөрэнээччилэрэ интэриэс оҥостон, Василий Васильевичтан маастарыстыбаҕа үөрэнэллэрэ киһини кэрэхсэтэр.

Василий Сабарайкин, норуот маастара:

 – Олорор сирбиттэн бэрт чугас боротуоканы кыйа талах бөҕө үүнэр ээ. Былырыын өрт уотун түмүгэр чугаһынааҕы талахтарым хатан хаалбыттарыттан олус диэн соһуйдум. Ону бу 84 сааспар тиийэн баран биллим  –  талах кэбирэх мас буоларын. Ону этэн эрдэхтэрэ, олоҕуҥ усталаах туоратыгар үөрэнэҕин, билбэтэххин билэҕин диэн.  

 Пригороднай бөһүөлэгиттэн боротуоканы кыйа үчүгэй талах мас көрдөөммүн ГРЭС -кэ тиийэ хаамабын ээ. Ол гынаммын сорох ардыгар олох булбакка кэлэбин. Синньигэс, токур талах элбэх буолар. Үчүгэй талах көһүннэҕинэ аны мутуктаах буолан эмиэ уһанарга табыгаһа суох.

Өбүгэлэрбит сүрдээх муударай да норуот. Кыстыкка, сайылыкка көһөллөрүгэр, талахтан иэҕиллибит мас олоппосторун илиилэригэр иилиннилэр даҕаны бара турдахтара.  

Василий Васильевич Сабарайкин - РФ норуотун үөрэҕириитин туйгуна, СӨ Бочуоттаах бэтэрээнэ, СӨ үөрэҕин систиэмэтин бочуоттаах бэтэрээнэ, «Урожай» ФСО бочуоттаах үлэһитэ, Таатта улууһун уонна Тыараһа нэһилиэгин бочуоттаах гражданина, «Социалистическай үлэ кыайыылааҕа», «Спорт национальнай көрүҥнэрин сайыннарыыга кылаатын иһин», «Тыараһа нэһилиэгин социальнай-экономическай сайдыытыгар кылаатын иһин», «Тыараһа нэһилиэгин спордун бэтэрээнэ», о.д.а.  бэлиэлэр туһааннааҕа.

Бу курдук үтүө үгэстэрбит көлүөнэттэн көлүөнэҕэ бэриллэн, утумнанан, олоххо салҕана туруохтун.