Куорат оҕолоро аны остолобуойга буолбакка, кафеҕа аһыыллар

Куорат түөрт оскуолатын остолобуойдара быйылгы үөрэх дьылыттан аныгылыы дизайннаах кафеҕа кубулуйдулар.

Ол курдук, Куорат оскуолаларын итии аһылыгынан хааччыйар киин (“ЦРО” МАО) быйыл Куорат лицейин, Н.А. Алексеева тэхиньиичэскэй лицейин, Саха-корейскай оскуола уонна Оҕо айымньытын дьиэтин остолобуойдарын аныгылыы кафеҕа кубулутта.

Бу Киин салайааччыта Варвара Кычкина этэринэн, оскуола кафетын концепцията көннөрү остолобуойтан уратыта элбэх. Ол курдук, кини бэлиэтииринэн, оскуола кафета көннөрү аһыыр эрэ сир буолбатах, бу – оҕо доҕотторун кытта алтыһан, үүнэр-сайдар эйгэтэ. «Хас биирдии дэтээли, өҥү, миэбэли кичэйэн туран таллыбыт. Оҕолор оскуола кафетыгар дьиэлэригэр курдук сананыахтара, ситиһиилэргэ кынаттаныахтара диэн эрэнэбит», – диэтэ кини.

Санатар буоллахха, кафелары саҥа миэбэлинэн, тэрилинэн хааччыйбыттар, сиэркилэ, сырдыыр истиэндэлэр баар буолбуттар. Оттон кафе истиэнэтин худуоһунньуктар илиинэн уруһуйдаабыттар, диэн Үөрэх управлениетын телеграм-ханаала суруйар.

Быйылгы үөрэх дьылыгар туох уларыйыы киирдэй?

* Үөрэх бырагырааматыгар «Духовно-нравственная культура России» диэн саҥа булгуччулаах предмет киирдэ. 
* Күһүҥҥү уонна сааскы каникуллар сэттэ хонуктан итэҕэһэ суох буолуохтаахтар.
* Хонтуруолунай уруок уонна ВПР ахсаана аҕыйыахтаах, ол эбэтэр маннык сорудахтар тустаах предмет 10 % эрэ ылыахтаахтар. * Өссө биир чэпчэтиинэн дьиэтээҕи үлэни толоруу бириэмэтэ быһыллыбыта буолар. Ол курдук, 1-гы кылаастар дьиэтээҕи сорудахтара күҥҥэ биир чаастан ордук бириэмэни ылыа суохтаах, 2–3-с кылаастар – балтараа чаастан ордук; 4–5-с кылаастар – икки чаастан ордук; 6–8-с кылаастар – икки аҥаар чаастан ордук; 9–11-с кылаастар – үс чаастан ордук. Ол туһунан үөрэх саайта суруйар.  

Хаартыска: Олохтоох дьаһалта саайтыттан