Куорат маастар-былаана Сайсары уокуругун биллэ тупсарыаҕа

Олунньу 5 күнүгэр баһылык Евгений Григорьев Сайсары уокуругун олохтоохторун иннигэр отчуоттаата. 
Баһылык ааспыт 2024 сылга дойду бэрэсидьиэнэ Владимир Путин өйөбүлүнэн олоххо киирбит куорат маастар-былаанынан үс бөдөҥ уопсастыбаннай туона тутуллубутун бэлиэтээтэ – Ленин болуоссата, Р.М. Дмитриев аатынан кытыл уонна Сайсары эбэ кытыла.
Сайсары уокуругар итини сэргэ ааспыт сылга 9 №-дээх Оҕо спортивнай оскуолата тутуллан үлэҕэ киирбитэ. 
Винокуров уулуссатын Ильменскэйтэн Чайковскайга диэри кэрчигэ, Макаренко уонна Генерал Притузов уулуссалара өрөмүөннэммиттэрэ. Чайковскай уул., 30/1, 30/3, 30/4 тиэргэннэригэр тупсарыы үлэтэ ыытыллыбыта. 
Быйыл Сэргэлээх суолун Гимеин эргиириттэн 8 км диэри кэрчигэ оҥоһуллар, итиэннэ Лермонтов уул., 178/1 тиэргэнэ тупсарыллар.

Саха политехническэй лицей эбии куорпуһа, 500 үөрэх, 200 уһуйаан, 350 интэринээт миэстэлээх Адаптивнай комплекс, 150 миэстэлээх кардио-сосудистай диспансер курдук бөдөҥ социальнай эбийиэктэр тутулла тураллар.
2030 сылга диэри уокурукка Лермонтов уулуссатын Петровскайтан Сэргэлээх суолугар диэри кэрчигэр, Ново-Карьернай, Лонгинов, Бекетов уулуссаларыгар, Бүлүүлүүр тракт Чайковскайтан ГИБДД поһугар диэри кэрчигэр тутуу, өрөмүөн үлэтэ ыытыллыахтара. 
Дьокуускай куорат маастар-былаанынан Сайсары уокуругар элбэх хамсааһын күүтүллэр Ол курудук, Чайковскай уулуссатыгар 450 миэстэлээх оскуола тутуллуоҕа, Билибин уулуссатыгар 990 миэстэлээх оскуола дьэндэйиэҕэ, 94-с кыбаарталга эмиэ 990 миэстэлээх оскуола күүтүллэр. Маны сэргэ хас даҕаны уһуйаан тутуллаары турар: Бүлүү трагын 4 км 300 миэстэлээх оҕо саада, Билибин уулуссатыгар 360 миэстэлээх оҕо саада, Борисовка-3 оройуонугар 360 миэстэлээх, маны сэргэ 86-с, 93-с, 94-с кыбаарталларга 240 миэстэлээх уһуйааннар, 112 кыбарталга – 200 миэстэлээх. Биир бөдөҥ эбийиэгинэн 500 миэстэлээх Оҕо искусствотын оскуолата буолуоҕа. 

Киирбит ыйытыылар анал байыаннай дьайыы кыттыылаахтарыгар дьиэ-уот усулуобуйатын тупсарыыны, доруобуйаларынан хааччахтаах оҕолор саҥа оскуолаларын таһыгар сылаас тохтобулу уонна оптуобус сырыытын, 12 №-дээх оптуобуһу Базовай переулоккка диэри уһатыы, Саха политехлицей таһыгар сатыы дьон туоруур сирин эбэтэр светофор наадатын туһунан буолла.
Сайсарылар маны сэргэ 17 №-дээх оптуобус тиһэх тохтобулугар сылаас тохтобулу, «сытар полицейскайы», тохтобуллар икки ардыларыгар саастаах дьон олорон сынньанарыгар ыскамыайкалары туруорарга этии киллэрдилэр. 2024 сылга 50 сылын бэлиэтээбит БАМ бэтэрээннэрэ үөрүүлээх тэрээһини ыытарга көрдөстүлэр.
Отчуот түмүгүнэн Сайсары олохтоохторо баһылык Евгений Григорьев үлэтин үчүгэйинэн сыаналаатылар, диэн Олохтоох дьаһалта пресс-сулууспата иһитиннэрэр.