Куорат кыстыкка бэлэмнэниитэ — мэр тус хонтуруолугар

Сырыы сыала-соруга — 2026-2027 сыллааҕы кыстыкка бэлэмнэнии хайдах баран иһэрин миэстэтигэр тиийэн көрүү, кэлэр соруктары туруоруу уонна үлэ хаачыстыбатын хонтуруолун күүһүрдүү.

Ол курдук, холобур, Лермонтов уулуссатыгар баар хочуолунайы көрдө: онно хочуолунай тэрилин саҥардыы үлэтэ ыытыллар. Ааспыт сырыыга суруйбуппут курдук, киин куораты сылааһынан хааччыйар 76 хочуолунайтан 15-гэр бу сайын өрөмүөн ыытыллар, сорохторугар тэрил саҥаҕа уларытыллар. Куорат устун тыргыллар уопсайа 23 км уһуннаах ититии ситимнэрин эргэрбит учаастактарын уларыталлар. Итинтэн 13 км ситим «Теплоэнергия» АУо бас билиитигэр, көрүүтүгэр-истиитигэр сылдьар.

Үлэ кыраапык быһыытынан бара турар. Бу күннэргэ 280-тан тахса элбэх кыбартыыралаах дьиэ ититиитин систиэмэтин олоччу сууйбуттар, 170 МКД турбата бэрэбиэркэлэммит. Социальнай эйгэ 400-тэн тахса тэрилтэтиттэн билиҥҥитэ 20 тэрилтэ турбата сууллан, сайҕанан бэлэм турар.  Олорор дьиэ пуондатын дьиэлэригэр кыстыкка бэлэм пааспарын туттарыы бэс ыйын 20 күнүттэн саҕаланар.

Евгений Григорьев тоһоҕолоон бэлиэтээбитинэн, кыстыкка бэлэмнэнии – хомунаалынай сулууспалар, ресурсанан хааччыйар тэрилтэлэр, салайар хампаанньалар үлэлэригэр инники күөҥҥэ турар тыын суолталаах сорук.  Толоруллар үлэ бигэргэммит күнүттэн хойутаабатын туһугар уокуруктааҕы дьаһалта хонтуруолугар сылдьар.

Салгыы Дьокуускай баһылыга уустук кэмҥэ түбэспит дьон быстах кэмҥэ олорон эрэригэр анаммыт (маневреннай) олорор пуонда тутуутун былаһааккатыгар сырытта. Санатан эттэххэ, бастакы оннук дьиэ Пионерскай уулуссаҕа тутулла турар. Дьиэ алта этээстээх, уопсай иэнэ 4612 кв.м иэннээх, 120 хостоох. Бу саҥа тутуу хаарбах, саахалланар туруктаах дьиэлэртэн көһөрүллүөхтээх уонна дьиэлэрэ кытарарга былдьаммыт куорат олохтоохторугар ананар.

Куорат баһылыга эппитинэн, Пионерскай уулуссаҕа саҥа эбийиэк үлэҕэ киирдэҕинэ, куорат маневреннай пуондатыгар баар хос ахсаана 2,5 төгүл эбиллиэҕэ. Бу уочарат түргэтииригэр көмөлөһүөҕэ.