Куорат күнүгэр лотереяҕа үс хостоох кыбартыыралар оонньоммуттаахтар

В.Г. Павлов аатынан “Сахамебель” ГУТ генеральнай дириэктэринэн П.П. Афанасьев үлэлээбит. Кини көҕүлээһининэн тэрилтэ лотереяны ыытарга эрдэттэн бэлэмнэммит, сайын дьаһалтаттан көҥүл ылбыт, бирииһин барытын бэйэтэ туруорбут – ол иһигэр үс хостоох икки кыбартыыраны оонньоппуттар.

Лотереяны оонньотуу балаҕан ыйын 20 күнүгэр А.Е. Кулаковскай аатынан култуура киинигэр тэриллибит. Түмүгүн “Эхо столицы”, “Наше время” уонна “Якутск вечерний” хаһыаттар балаҕан ыйын 26 күнүнээҕи нүөмэрдэригэр бэчээттээбиттэр.

“Киин куорат” ол лотереяҕа оонньоммут икки кыбартыыраттан биирдэстэрин сүүйбүт Любовь Заровняеваны булан кэпсэттэ:

- 2003 сыллаахха куорат күнүгэр лотерея оонньоппуттара. Билиэти биһиги бэйэбит атыыласпатахпыт. Атырдьах ыйыгар төрөөбүт күммэр эдьиийим ылан бэлэхтээбитэ. Тугу да сүүйүөхпүт эҥин диэн санамматахпыт биллэр.

Балаҕан ыйын саҥатыгар Куорат күнэ оруобуна кыыһым уруутун малааһынын күнүгэр буолбута. Түмүгүн  “Эхо столицы” хаһыакка таһаарбыттарыгар көрөн билбиппит. Борисовка-3 дьоҕус оройуоҥҥа 3 хостоох кыбартыыраны сүүйбүт эбиппит. Сүрүн бириистэри “Сахамебель” фирма спонсордаабыт этэ. Кыбартыырабар өр сылларга кыыһым ыал буолан олорбута. Бу дьиэттэн тирэх ылан, алта оҕолоох саха сайдам ыала буолбуттара. Билигин төрөөбүт дойдуларыгар көһөн үлэлии-хамсыы сылдьаллар.

Дьокуускай 370 сылынан сүүйбүт дьиэбитигэр билигин бэйэм олоробун.  Дьиэбитин бары наһаа истиҥник таптыыбыт, дьылҕабытыгар уонна тапталлаах Дьокуускай куораппытыгар махтанабыт.

***

Лотереяҕа оонньоммут иккис кыбартыыраны Томпоттон төрүттээн Афанасий Афанасьевич Борисов сүүйбүт. Сүүйүүлээхтэргэ дьиэ күлүүһүн алтынньыга туттарбыттар.