Куорат хаһаайыстыбатын күннээҕи түбүктэрэ

Ирбэт тоҥ үрдүгэр турар куорат күннээҕи түбүгэ, кыһыннары-сайыннары бүппэт кыһалҕата үгүс, бииртэн биир күөрэйэн тахса турар. Этэргэ дылы, кыһыны – саас, хаары – ардах, бадарааны – быыл солбуйан иһэр.

Олохтоох дьаһалта тутаах тэрилтэлэрэ телеграм-ханаалларыгар күннээҕи үлэлэрин отчуоттууллар. Бүгүн ону үөрэтэн, түмэ тардан, сүрүнүн ааҕааччыларбытыгар сырдатарга соруннубут.   

Чалбах уутун оборторуу

Ааспыт нэдиэлэҕэ ыам ыйын илгэлээх ардаҕа олус уһаан-кэҥээн, алдьатыылаах соҕустук ааста. Сорох-сорохтор кэтэспиттэрин кэмсиннилэр быһыылаах. «Аматын да иһин, халлааҥҥа уу элбэх да эбит!» – диэн саҥа аллайыы үгүстүк иһилиннэ. Чахчы, оннук! Холобур, аҥаардас ыам ыйын 14 күнүгэр биир суукка иһигэр сөҥүү ыйдааҕы нуорматын 75%-на түспүт. Бу үлүгэр курулаччы «куппутун» кэннэ, биллэн турар, куораппыт ууга барар кутталлана сырытта.

«Жилкомсервис» МУТ ассенизаторскай тиэхиньикэтэ уонна чааһынай бэдэрээтчиттэр суукканы эргиччи үлэлээтилэр. Оттон управалар мотопомпаларынан, носуостарынан оборторон, күүс-көмө буоллулар. Ол курдук, ыам ыйын 15 күнүгэр барыта 4,6 куб. миэтэрэ кэриҥэ ардах уута хачайдаммыта, онуоха 35 ассенизатор массыына кыттыбыта бэлиэтэннэ. Бу диэн эттэххэ, иллэрээ күннээххэ диэри хас да массыына чалбах ортотугар үлэлии турарын илэ харахпынан көрбүтүм. Онон ааспыт ардах куорат хаһаайыстыбатыгар ыар содуллаах буолбутун сэрэйиэххэ эрэ сөп.   

Суол кытыыларын ыраастааһын

«Якутдорстрой» АУо оробуочайдара суол кытыыларыттан мунньуллубут кумаҕы, бөҕү-сыыһы ыраастыыллар. Манна даҕатан эттэххэ, куорат уулуссаларыгар уу ыстара-ыстара, сиппийэ сылдьар массыына, үлэни чэпчэтэр уонна түргэтэтэр дьоҕус тиэхиньикэ элбээбитин бэлиэтии көрбүт буолуохтааххыт. Бу «өйдөөх» көмөлөһөөччүлэр, быылы өрүкүппэккэ, көдьүүстээхтик ыраастыыллар эбит.   

Суол-иис инфраструктуратын уонна куорат тырааныспарын департамена иһитиннэрэринэн, үлэ бигэргэтиллибит былаанынан, графигынан ыытыллар. Дьокуускай киин өттө эрэ буолбакка, кытыы учаастактара эмиэ хабыллаллар. Холобур, бу иннинэ Бестужев-Марлинскай, Семен Данилов, Новопортовской, Кальвица уонна да атын уулуссаларга туһааннаах үлэ түмүктэммит.   

Көҥүлэ суох сыбаалканы тиэйии

Кыһын устата күрдьүк курдук мунньуллан испит, халыҥ хаар анныгар кистэнэн сыппыт «баайбыт» килэс гына түһээхтээтэҕэ. Көҥүлэ суох сиргэ чөмөхтөммүт «норуот» сыбаалкалара уопсай көстүүнү буортулууллар, экологияны киртитэллэр. Итиэннэ управаларга «төбө ыарыыта» буолаллар.

Хаартыскаҕа: Строительнай уокурукка бөҕү тиэйии түгэннэрэ

Оптуобус тохтобулларын көрүү-истии

Дьокуускай куораты салайыы муниципальнай киинэ (МЦУ) ыам ыйын 1 күнүттэн сылаас тохтобуллар, куортамҥа тураллартан ураты, сабыллыбыттарын туһунан иһитиннэрэр. Бу дьаһал муниципальнай баайы-дуолу харыстыыр сыаллаах ылыллыбыта чуолкай.

Хомойуох иһин, кыһыҥҥы тымныыттан абырыыр, хахсаат тыалтан харыстыыр хаарыан тохтобулларбытын вандаллар урусхаллыыллара, ыһан-тоҕон тыыннарын таһаараллара кимиэхэ да кистэл буолбатах. Онон сылаас кэмҥэ хатанан тураллара оруннаах курдук.

Хаартыскаҕа Сайсары уокуругар бэдэрээтчиттэр тохтобул павильоннарыгар үлэлии сылдьаллар.  Манна эбэн эттэххэ, куорат үрдүнэн тохтобуллар тас өттүлэрэ, түннүктэрэ нэдиэлэҕэ биирдэ сууйуллар-сотуллар.

«Дьаама өрөмүөнэ» салҕанар

Кылгас сайыннаах Саха сиригэр суол өрөмүөнэ хайыы үйэ үгэннээн турар. Дьокуускайга «Якутдорстрой» тэрилтэ аспаал суоллары абырахтыыр үлэни тиһигин быспакка ыытар. Суол-иис инфраструктуратын уонна куорат тырааныспарын департамена иһитиннэрэринэн, онуоха итии аспаал, бетон булкааһа туттуллар.

Биллэн турар, ханнык баҕарар өрөмүөн үлэтэ суоппардарга, айанньыттарга кэккэ күчүмэҕэйдэри үөскэтэр. Ол эрээри быстах кэмҥэ тулуйа түһэрбитигэр тиийэбит.

Куораты көҕөрдүү

Куорат баһылыгын көҕөрдүү үлэтигэр сүбэһитэ Екатерина Олеговна Павлова иһитиннэрбитинэн, ааспыт нэдиэлэттэн оту-маһы, ыарҕалары тас көстүүлэрин тупсарар, салгыы уһуулларын ситиһэр сыалтан быһар, лэппийэн биэрэр үлэ ыытыллар. Маныаха уулусса-суол ситимигэр турар үүнээйилэр хабыллаллар. 

Үлэ Ленин проспегыттан саҕаламмыт. Манна 2022 уонна 2023 сылларга 6 тыһыынча кэриҥэ үүнээйи олордуллубутун санатар тоҕоостоох. Онтон үксэ үһүс кыһынын этэҥҥэ туораан, силигилээн эрэр. Хомойуох иһин, кыһын устата саҥа олордуллубут хас эмэ уонунан ахсааннаах хахыйаҕы, акацияны уонна долохонону сатыы дьон үктээн, оттон массыыналар тэбистэрэн ааспыттар. Эмсэҕэлээбит үүнээйилэри чөлүгэр түһэрэр үлэ ыытыллыаҕа.  

Бу туһунан куорат баһылыга Евгений Григорьев телеграм-ханаалыгар суруйар.

Дьокуускай куораты Салайар муниципальнай киин иһитиннэрэринэн, газоннартан бөҕү-сыыһы, сэбирдэҕи ыраастааһын, газоннарга уу кутуу ыам ыйын 15 күнүттэн саҕаламмыт. Итиэннэ мантан ыла суол күрүөлэрин өрөмүөннүөхтэрэ. 

Кутуу суоллары дэхсилииллэр

Бу күннэргэ Очиченко, Леваневскай, Полина Осипенко уо.д.а. уулуссаларга грейдер үлэлээтэ. Ол иннинэ Чепалов уулуссатын, Намсыыр суолун дэхсилээбиттэрэ. Үлэ тохтообот, салҕанан барар. 

Тротуардары сууйуу

Ааспыт нэдиэлэҕэ Ленин проспегар тротуардары сууйа сылдьалларын көрөн, сорохтор соһуйбут буолуохтаахтар. Бу – улахан куораттарга быылы хаптатарга, ырааһы тутарга киэҥник тарҕаммыт ньыма Дьокуускайга туттуллара тоҕоостоох. 

Уопсастыбаннай туоналары көрүү-истии

Куораппытыгар пааматынньык, сквер элбээн иһэриттэн үөрэбит. Ол эрээри ону көрүөххэ-истиэххэ наада эбээт. Нэһилиэнньэ өттүттэн харыстабыллаах сыһыан, үлэһит дьоҥҥо ытыктабыл эмиэ эрэйиллэр. 

Спорт уонна оҕо былаһааккаларыгар – ураты болҕомто

Аҕыйах хонугунан үөрэх дьыла түмүктэниэҕэ, оҕо аймах сайыҥҥы сынньалаҥҥа тарҕаһыаҕа. Ким дэриэбинэҕэ, даачаҕа сайылыы тахсыаҕа, сорох лааҕырга барыаҕа эбэтэр муораҕа айанныаҕа. Оттон куораттан ханна да барбат оҕолор мустан оонньуур, сүүрэр-көтөр, мээчиктиир сирдэрэ – спорт уонна оҕо былаһааккалара. Онон бу эбийиэктэргэ ураты болҕомто ууруллар.

Субуотунньуктар

Киин куоракка саас аайы субуотунньуктар биллэриллэллэр: управалар,  кэлэктииптэр, уопсастыбанньыктар уо.д.а. көхтөөх кыттыыны ылаллар. 

Ыам ыйын 18 күнүгэр экоактыбыыстар тэрийиилэринэн, «Синет Спарк» аһымал пуонда уонна «Skintime» хампаанньа өйөбүллэринэн үгэскэ кубулуйбут «Мусору.Нет» куорат уопсай субуотунньуга буолан ааста. Бу сырыыга плоггинг диэн спорду кытта дьүөрэлиир сонун көрүҥүнэн ыытылынна. Ол курдук, кыттааччылар икки хамаандаҕа арахсан, балтараа чаас устата бөҕү хомуйууга күрэхтэстилэр. Актыбыыстар Намсыыр суолун 16 км баар ойууру ыраастаатылар. Барыта 100 куб.миэтэрэ бөҕү хомуйдулар.

«Бастыҥ булумньулар», «Саамай кыра уонна аҕа саастаах кыттааччы», «Саамай элбэх киһилээх хампаанньа», «Иллээх дьиэ кэргэн» диэн анал ааттары туттардылар. Субуотунньукка кыттыбыт оҕолор бириис ылан, үөрдүлэр-көттүлэр.   

Ордук кэрэхсэбиллээҕэ диэн, сонун тэрээһин эдэриттэн-эмэниттэн тутулуга суох, 130 киһини түмтэ. Бэл диэтэр, быыкаа кырачааннар, аҕам саастаах ытык кырдьаҕастар үтүө бачыымы өйөөтүлэр. Маладьыастар!

Хаартыска: Норуоттар икки ардыларынааҕы креативнай сатабылы сайыннарар «Медиашкола»

Хаартыскалар:
@mtsuykt, @ProAvtobusYkt, @EvgenyGrigorev, @stroitokrug,
@oktyabruprava телеграм-ханааллартан