Куорат дууматын дьокутааттара баһылык отчуотун үчүгэйинэн сыаналаатылар

Куорат баһылыга Евгений Григорьев олунньу 26 күнүгэр ааспыт 2024 сыл түмүгүнэн бүтэһик отчуота Куорат дууматын дьокутааттарын иннигэр буолан ааста.
Санатар буоллахха, тохсунньу 27 күнүттэн олунньу 26 күнүгэр диэри Евгений Григорьев отуттан тахса тэрилтэ уонна түмсүү иннигэр отчуоттаата, ол иһигэр: куорат 15 уокуругун уонна нэһилиэгин олохтоохторугар, уопсастыбаннай түмсүүлэр, бөдөҥ тэрилтэлэр бэрэстэбиитэллэригэр. Быйылгы отчуот саҥаны киллэриитинэн баһылык куорат төрөппүттэрин иннигэр отчуоттаабыта буолла. Отчуоттары 43 тыһ. кэриҥэ киһи кэлэн, сорохтор тэйиччиттэн иһиттэ, ыйытыы биэрдэ.
Евгений Григорьев отчуотун кэнниттэн дьокутааттар элбэх кыбартыыралаах дьиэлэргэ муниципальнай библиотекалары тэрийии, сайыҥҥы оҕо лааҕырдарыгар куорат таһыгар сир учаастагын биэрии, доруобуйаны харыстыыр инфраструктураны тэрийии, куорат суолларын паспордааһын уонна салгыы көрүү-истии, хомунаалынай хаһаайыстыба эйгэтигэр лицензия хонтуруолун, туризмы сайыннырыы, хайыһар спордунан дьарыктанарга усулуобуйаны тэрийии туһунан ыйытыылары биэрдилэр.
Ыйытыыларга хоруйдааһын кэнниттэн дьокутааттар баһылык Евгений Григоьев отчуотугар үчүгэй сыанабылы биэрдилэр, диэн иһитиннэрэ Олохтоох дьаһалта пресс-сулууспата. Хаартыска: Куорат дууматын пресс-сулууспата.