Куорат дууматын 13-с уочарата суох сессията

Куорат дууматын 13-с уочарата суох сессията куорат 2025 сыллааҕы бүддьүөтүгэр, куорат баһылыгын быыбарыгар уларытыылары киллэриини уо.д.а. боппуруостары көрдө.

Ол курдук, куорат 2025 сыллааҕы бүддьүөтүн дохуоттаах чааһа 208 мөл. солк. намтаан, 32 199 мөл. солк., ол иһигэр: нолуогу таһынан уонна нолуоктан киирии – 15 720 мөл. солк., Арассыыйа Федерациятын атын бүддьүөттэиттэн субсидиялар, дотациялар суоттарыгар – 16 478 мөл. солк. буолара сабаҕаланар.

Бүддьүөт ороскуоттаах чааһа 33 059 мөл. солк. быһыллыбыт. Манна сүрүннээн хаарбах дьиэттэн көһөрүү, үөрэхтээһин, хомунаалынай инфраструктура киирсэллэр.

Биир сүрүн боппуруоһунан куорат баһылыгын дуоһунаһа буолла. Санатар буоллахха, 2024 сыл сэтинньи 27 күнүгэр куорат дьокутааттара баһылыгы куонкурус түмүгүнэн аныыр туһунан быһаарыыны ылыммыттара.

– Дьокуускай куорат Дуумата Олохтоох дьаһалта баһылыгын куонкурус түмүгүнэн талыыга көһөр туһунан быһаарытын өссө төгүл бигэргэттэ. Бу этиини дьокутааттар баһыйар өттүлэрэ өйөөтө.

Чугастааҕы кэмҥэ сокуоҥҥа уларытыылары киллэриигэ көҕүлээһиммит Ил Түмэн көрүүтүгэр киириэҕэ. Ил Түмэн дьокутааттара биһиги этиибитин өйүүр түгэннэригэр, куорат дууматын иннигэр баһылыгы куонкуруһунан талыы бэрээдэгин оҥоруу буолуоҕа. Маныаха сүрүн ирдэбиллэринэн салайар дьоҕур, куорат уонна нэһилиэнньэ интэриэһин туруорсар кыах, дьаныар, билии, сатабыл буолуохтара, – диэн быһаарар Куорат дууматын бэрэссэдээтэлэ Альберт Семёнов.

Куорат дууматын уочараты таөһынан сессията маны сэргэ «Дьокуускай куорат үп-экономическай эйгэтигэр үтүөлэрин иһин» бэлиэнэн Наталья Унарованы, Экономика уонна стратегическай былаанааһын департаменын экспертнэй-ырытар салаатын начаалынньыга, наҕараадалыыр туһунан боппуруоһу көрдө, диэн Куорат дууматын пресс-сулууспата иһтиннэрэр.