Куорат дьокутааттара бүддьүөтү көрүүгэ бэлэмнэнэн эрэллэр

Ол курдук, Урбааҥҥа, промышленнаска уонна тырааныспарга сис хамыыһыйа экономика уонна үп департаменнара бэлэмнээбит информацияларын үөрэттилэр. Бүддьүөт барылын быһыытынан, «Куорат тырааныспарын ситимэ» бырагыраама иитинэн суолу тутуу, хапытаалынай өрөмүөн, бырайыак докумуонун оҥоруу, сылаас тохтобуллары көрүү-истии, ИТС чааһыгар үбүлээһин кээмэйэ улааппыт. Оттон кэккэ муниципальнай бырагыраамалары үбүлээһин, ол иһигэр «Урбааны уонна туризмы өйөөһүн уонна сайыннарыы» бырагырааманы, сорох тэрээһиннэр 2025 сылга бүппүттэринэн, сарбыллыбыт. Хамыыһыйа бэрэссэдээтэлэ Ольга Шерстянникова бэлиэтииринэн, урбаан хайысхата куорат бүддьүөтүн оҥорууга сүҥкэн оруоллааҕынан өйөбүллээх буолуохтаах.

Социальнай өйөбүл уонна доруобйа харыстабылын сис хамыыһыйата «Ыччат. Дьиэ кэргэн. Спорт. Чэгиэн куорат» («Молодежь. Семья. Спорт. Здоровый город») муниципальнай бырагырааманы үбүлээһини дьүүллэстэ. Дьокутааттар «Чэгиэн куорат» хос бырагыраама бүддьүөтэ, чуолаан нэһилиэнньэ кэккэ араҥатыгар диспансеризация өҥөтүн оҥоруу чааһа, сарбыллыбытын кытта сөпсөспөттөрүн биллэрдэр. «Социальнай өйөбүл уонна нэһилиэнньэ дьарыктаах буолуута» бырагыраама иһинэн «Дьокуускай куорат инбэлииттэригэр социальнай өйөбүл» муниципальнай бырагырааманы үбүлээһин 13,8% сарбыллыбыт. Ол төрүөтүнэн «Өлүөнэ очуостара» айылҕа пааркатыгар айан тохтотуллубута буолбут. Онон бүддьүөт барыла бу боппуруостарынан ыйытыылаах ылылынна; холобур, Өлүөнэ очуостарын оннугар атын сынньалаҥ боппуруоһун көрүөххэ эбэтэр үбүлээһини материальнай көмөҕө тыырыахха сөп диэн.

Территориялары сайыннарыы уонна агропромышленнай комплекс хамыыһыйатын дьокутааттара Тыа хаһаайыстыбатын управлениетын ыһыы уонна хомуур хампаанньаларын түмүгүнэн отчуотугар олоҕуран биэдэмистибэ үлэтин көдьүүстээҕинэн сыаналаатылар. Бүддьүөт барылын кэккэ этиилээх ылынна. Бу туһунан Куорат дууматын пресс-сулууспата иһитиннэрэр.