Куорат дьаһалтата «Сатал» олохтоохторун кыһалҕаларын быһаарар

Ыам ыйын 22 күнүгэр Олохтоох дьаһалта оробуочай бөлөҕө Мархаҕа «Сатал» олохтоохторун кытта көрсөн, сиринэн уонна тутуунан дьарыктаныы быраабылаларын быһаарыаҕа, бөҕү тиэйии уонна уулусса-суол ситимин кыһалҕаларын дьүүллэһиэҕэ.

Бу иннинэ ыам ыйын 20 күнүгэр «Сатал» СНТ олохтоохторун боппуруоһа куорат дьаһалтатыгар көрүллүбүтэ. «Сатал» СНТ салалтата үөскүүр кыһалҕалары быһаарартан туора турбутунан сибээстээн, олохтоохтор муниципальнай былаастан көмө көрдүүргэ күһэллибиттэр. Саадынан, оҕуруотунан дьарыктанар табаарыстыбалар үлэлэрин сүрүннүүр 217 №-дээх федеральнай сокуон быһыытынан, гаас, уот, уу өҥөтүн тиэрдэр тэрилтэлэри, суолу оҥорооччулары, бөҕү тиэйээччилэри кытта дуогабардарынан чуолаан СНТ бэрэссэдээтэлэ уонна бырабылыанньата дьарыктаныахтаах. Эрдэ куорат баһылыга Евгений Григорьев Суол инфраструктуратын уонна тырааныспар департаменыгар суолу тутуу былааныгар «Сатал” сүрүн суолун – Севастьяновская уулуссаны – «Нам» массыына суолуттан саҕалаан «Севернай» дьоҕус түөлбэ кыраныыссатыгар диэри учаастагын көрүүнү-истиини киллэрэргэ көҕүлээбитэ. Бу дьаһал олоххо киирэрин «Сатал» СНТ өттүттэн туһааннаах докумуоннары толоруу кыаллыбата атахтаабыт.

Бэлиэтээн эттэххэ, маннык быһаарыы 2023 сыллаахха “Сатал» түөлбэ олохтоохторун көрдөһүүтүнэн куорат баһылыга 106 №-дээх муниципальнай оптуобус сырыыта тэриллибитин кытта ситимнээх.

Туһааннаах докумуоннар ситтэхтэринэ, суол муниципальнай бас билиигэ киирэн, көрүүгэ-истиигэ туруохтаах, маны таһынан хапытаалынай өрөмүөн былааныгар киирэр кыахтаах.

***

Бэлиэтээн эттэххэ, «Сатал» СНТ кыһалҕалара баһылык Евгений Григорьев тус хонтуруолугар тураллар. «Сатал» олохтоохторун биир тыын кыһалҕаларынан сир уонна бөх боппуроустара буолаллар.

Олохтоох дьаһалта Быраап боппуруостарыгар департаменын чахчытынан, СӨ Үрдүкү суутун 2025 сыл муус устар 29 күнүнээҕи быһаарыытынан “Сатал” 9, 11 уонна “Молодежнай” кыбартаалларын, ону сэргэ 10 кыбартаал 49 учаастагын сирдэрэ С-1 (тыа хаһаайыстыбатын аналынан туттуллар сирдэр) категорияҕа киирии чааһыгар федеральнай сокуону утараллар.

Инньэ гынан ыам ыйын 22 күнүгэр сиринэн туһаныы сокуонун таһынан «Якутскэкосети» региональнай операторынан кытаанах бөҕү тиэйтэрии боппуруоһа дьүүүллэһиллиэҕэ. Бэлиэтээн эттэххэ, бүгүҥҥү күҥҥэ “Сатал” бөх тоҕор контейнердара суоҕуттан олохтоохтор бөхтөрүн куорат атын оройуоннарыгар тиэйэн илдьэ быраҕаллар. Ол туһунан Олохтоох дьаһалта пресс-сулууспата иһитиннэрэр.