Куорат биир тыын кыһалҕата хайдах быһаарылларый?

Уу – олох төрдө диэн норуот бэргэн этиитэ баар. Күннээҕи олохпут уута суох биир даҕаны күҥҥэ табыллыбат эбээт. Дэриэбинэҕэ сайыҥҥы өттүгэр биир эмэ күн уу баһар массыына сүүрбэтэҕинэ, ыал кэпсэтиитэ ол эрэ туһунан буола түһэр.
Оттон куорат сиригэр кыраантан уу кэлбэт буоллаҕына хайдах балаһыанньаный? Тутатына төлөпүөн үрдүгэр түһэммит, боппуруоһу быһаарсыбытынан, «Водоканал» тэрилтэ нүөмэрин көрдөөбүтүнэн барабыт. Уубут тохтоон хааллаҕына, крантан аһары хлордаах дуу, кирдээх, дьэбиннээх дуу уу кэлэр түгэнигэр, эмиэ, буруй эрэ моттойоҕо диэбиккэ дылы, «Водоканалы» булабыт. Онтубут оруннаах эбит дуу, оруна суох эбит дуу? Бу туһунан «Водоканал» аахсыйалаах тэрилтэ нэһилиэнньэҕэ өҥөнү оҥорор салаатын салайааччыта Махмуд Сунхалыровтан чуолкайдастыбыт.
– Махмуд Бахтиерович, бастатан туран, тэрилтэ үлэтин билсиһииттэн саҕалыах.
– «Водоканал» тэрилтэ төрүттэммитэ быйыл 84-с сыла. Мин бу тэрилтэҕэ алтыс сылбын үлэлиибин.
Тэрилтэбит сүрүн сыала-соруга диэн – өрөспүүбүлүкэ олохтоохторун ыраас уунан хааччыйыы уонна канализация өҥөтүн тиксэрии. Бүгүҥҥү туругунан, Дьокуускай куоракка, Жатайга, Покровскай куоракка уонна Үөһээ Бүлүү улууһугар ити үлэбитин ситиһиилээхтик толоро олоробут. Бу барыта тэрилтэ үлэһиттэрин эппиэтинэстээх уонна түмсүүлээх үлэтин түмүгэ. Ол курдук, 2024 сылга туруоруммут сыалбытын ситиһиилээхтик толордубут. Инникитин өссө да үрдүк сыаллар, соруктар күүтэллэр.
– Олус үчүгэй. Куорат олохтооҕо уу ситимигэр холбоноругар бастаан туохтан саҕалыырый?
– Тымныы, итии уу ситимигэр холбонорго, олохтоохтор да буоллун, атын тэрилтэлэр да буоллун, уунан хааччыйар тэрилтэлиин дуогабар түһэрсииттэн саҕалыыллар. Ол дуогабарга олоҕуран, хааччыйар тэрилтэ биһиги тэрилтэлиин, о.э. «Водоканаллыын», өҥөнү тиэрдэргэ көҥүл ылара ирдэнэр. Куорат олохтооҕо холбонон баран хайаан даҕаны сокуон быһыытынан счетчик туруортарыахтаах. Дуогабар түһэрсэригэр хаһаайын докумуона, дьиэ докумуона уонна счетчик пломбаламмытын туоһулуур докумуон ирдэнэллэр.
– Дьэ, арай ол счетчигым алдьанар түгэнигэр, техобслуживаниены эһиги тэрилтэҕит оҥорор дуо?
– Оннук өҥөнү тириэрдибэппит. Манна идэтийэн дьарыктанар тэрилтэлэри кытта дуогабардаахпыт. Холобура, “Ресурс контроль”, “Фаворит96” уонна чааһынай тэрилтэлэр биһиги ааппытыттан счетчигы уларытан да биэрэллэр, пломбаны да туруораллар. Уопсайынан, техобслуживаниены ыытарга олохтоохтор анал тэрилтэлэри, салайар хампаанньалары кытта дуогабар түһэрсэллэр. Кыбартыыраҕа турар тымныы, итии уутун счетчига дьиэлээх хаһаайын бэйэтин чааһынай бас билиитэ. Ол үчүгэйдик үлэлиирин, пломбата бүтүнүн, тэстиитэ суох буоларын көрөр-истэр эбээһинэстээх. Оттон счетчигы салайар хампаанньа уларытыан сөп эрээри, пломбалааһынын хайаан даҕаны маны хааччыйар тэрилтэ оҥорор: тымныы ууну – «Водоканал», итии ууну – «Энергосбыт».
– Төлөбүргэ тохтуох эрэ, Махмуд Бахтиерович?
– Хомунаалынай өҥө тарыыба СӨ судаарыстыбаннай сыана политикатыгар кэмитиэтин уурааҕыгар олоҕуран бигэргэтиллэр. Нэһилиэнньэ сорох араҥатыгар чэпчэтиилээх тарыып эмиэ манан быһаарыллар. Онно олоҕуран, нэһилиэнньэттэн төлөбүр хомуллар.
– Туох ыарахаттары көрсөҕүт?
– Сүрүн мэһэйинэн өҥөнү туһанааччы өттүттэн төлөбүрү хойутатыы буолар. Олохтоохтор счетчик көрдөрүүтүн бириэмэтигэр биэриэхтээхтэр. Оччотугар төлөбүр суумата төһөнү ороскуоттаабыттарынан ааҕыллар. Оттон көрдөрүү кэмигэр тиксэриллибэтэҕинэ, нормативынан ааҕыы барар, ол түмүгэр иэс кээмэйэ үрдээн тахсыан сөп.
Иэс үөскэтии буолбатын туһугар нэһилиэнньэни кытта утумнаах үлэни ыытабыт. Ааспыт 2024 сылга төлөбүрү 100% хомуйдубут.
– “Кыраантан кирдээх уу кэлэр” эбэтэр “хлора олус элбэх” диэн куорат олохтоохторуттан «Водоканал» аатыгар этиилэр төһө оруннаахтарый? Маннык түгэҥҥэ ханна, кимиэхэ туруорсалларый?
– Манна даҕатан эттэххэ, 2018 сылтан ууну ыраастыыр сыалга хлор оннугар доруобуйаҕа буортута суох натрий гипохлорита туттуллар. Гипохлорит көннөрү туустан электролиз көмөтүнэн ылыллар. Оттон «Водоканал» ыраастаан ыыппыт уута нэһилиэнньэҕэ, хас биирдии туһанааччыга тиийиэр диэри хас да хаһаайын турбатынан ааһар. Онон уу хаачыстыбатыгар хас да тэрилтэ эппиэтинэстээх диэххэ наада. Ол курдук, биһиги магистральнай турбабыт барыта сир аннынан ааһан, кыбаарталлардааҕы хочуолунайдарга, тепловой пууннарга тиийэр. Онтон олортон дьиэҕэ киирэр узелга диэри транспортировщиктар турбалара барар – «Якутскэнерго» уонна «Теплоэнергия» турбалара. Салгыы дьиэ уопсай киириититтэн (вводуттан) кыбартыыраҕа тиийиэр диэри – салайар хампаанньа эппиэтинэһэ. Дьэ бу мантан салгыы аны салайар хампаанньа көрөр-истэр учаастага. Ити курдук, уу кыбартыыраҕа тиийиэр диэри үс хаһаайын турбатынан ааһар.
– Махмуд Бахтиерович, кэпсэтиибит түмүгэр тугу тириэрдиэҥ этэй?
– Нэһилиэнньэҕэ «Водоканал» ыраас уутун туһанан чэгиэн-чэбдик буолуҥ диибин. Уонна бириэмэтигэр итии, тымныы уу счетчиктарын көрө-истэ, уларыта сылдьалларыгар, счетчик көрдөрүүтүн кэмигэр тиэрдэн, төлөбүрү хойутаппакка оҥороллоругар баҕарабын.
Дьокуускай куорат олохтоохторуттан кыбартыыраны уунан хааччыйыы хаачыстыбатын туһунан ыйыталаһыыга маннык хоруйдар киирдилэр.
Степан Кимович: «Биһиги быйылгыттан куорат олохтоохторо буоллубут. Наһаа үчүгэй ып-ыраас уу кэлэр. Төлөбүрэ да удамыр. Ыраастыыр фильтр нөҥүө кыраантан тымныы уу иһэ олоробут».
Анастасия: «Водоканал» үлэтэ лаппа тупсубута биллэр да, көстөр даҕаны. Урут дьэбиннээх уу түһэрэ мэлдьэх буолбатах. Ол бүтүөр диэри ыытан баран биирдэ суунар этибит. Онтон, хлорун көтүтээри, хас эмэ күн туруоран баран оргуттан иһэр кэмнэрдээх этибит. Билигин ардыгар кыраантан тымныы ууну тута куттан да иһэбин ээ».
Ирина Николаевна: «Ильинкаҕа» быйыл уу кыһалҕата үөскээбэтэ. Урут аҕыйах хонукка кыратык бара сылдьааччы. Счетчигы бэрэбиэркэлииллэр. Харчыны «Водоканалга» кэмигэр төлүүбүт».
Николай Иванович: «Куорат киинигэр Киров уулуссаҕа олорбуппут син балайда буолла да, итии да, тымныы да уубут уһуннук арахсан эрэйдээбитин өйдөөбөппүт. Араарар буоллахтарына, эрдэттэн биллэрэллэр.
«Водоканал» саҥа ыраастыыр ыстаансыйаны туруоруоҕуттан тымныы уубут сааскы халаан да кэмигэр дьэҥкир, ыраас буолар. Уунан хааччыллыыны онон үчүгэй диэн сыаналыыбыт. Куорат атын оройуоннарын билбэппит».
Мария Николаевна: «Прометей» оройуонугар олохтонуоҕуттан олоробут даҕаны, ууга кыһалҕаны көрсө иликпит. «Прометей» салайар хампаанньа нөҥүө барытын быһаарса олоробут.
Дьэ, куорат араас оройуонугар олорор дьону кытта кэпсэтии түмүгэ итинник буолла.
Мантан салгыы 2 ГИС-тан счетчигы уларытар эбэтэр сыысхала суох үлэлиирин бэрэбиэркэлиир тэрилтэлэри булан кэпсэттибит. Эрийээппитин тутатына эйэҕэс баҕайы куоластаах диспетчер саҥата: «Үтүө күнүнэн, туохха наадыйаргытын этиҥ», – диэн кэпсэтиини саҕалаата.
Хайдах балаһыанньаҕа уу счетчигын уларытабыт?
Манна үс көрүҥ баар эбит: бастакытынан – счетчик бэрэбиэркэтин ааһа илик буоллахха; иккиһинэн – алдьанар түгэнигэр; үсүһүнэн – сулууспатын болдьоҕо бүппүт түгэнигэр.
Счетчик болдьоҕо диэн тугуй?
Тымныы уу (ХВС) счетчигын алта сыл туһаныы кэннэ бэрэбиэркэлэтиллэр, итии уу ( ГВС ) счетчигын болдьоҕо түөрт сылга тэҥнэһиэхтээх эбит.
Бу курдук, уу боппуруоһун тула сүрүн «Водоканал» тэрилтэттэн, нэһилиэнньэҕэ өҥөнү оҥорууга идэтийбит исписэлиистэртэн саҕалаан, Дьокуускай куорат араас оройуоннарыгар олорор нэһилиэнньэни кытта уу тула кэпсэттибит.
«Водоканал» тэрилтэ гражданнары кытта көрсөр графига:
Кырджагасов Анатолий Андреевич, генеральнай дириэктэр — хас сэрэдэ аайы 16:00 чаастан 17:00 чааска диэри;
Пушмин Виктор Николаевич, генеральнай дириэктэри бастакы солбуйааччы — хас чэппиэр аайы 16:00 чаастан 17:00 чааска диэри;
Аммосов Андрей Андреевич, сүрүн инженер — хас оптуорунньук аайы 16:00 чаастан 17:00 чааска диэри;
Сунхалыров Махмуд Бахтиерович, өҥөнү батарыы управлениетын начаалынньыга — хас оптуорунньук аайы 15:00 чаастан 16:30 ч. диэри;
Севергин Василий Юрьевич, производственнай-тэхиньиичэскэй сулууспа начаалынньыга — хас бээтинсэ аайы 16:00 чаастан 17:00 чааска диэри.
Биир кэлим нүөмэр: +7(4112) 50-90-90
Киин диспетчерскэй сулууспа+7 (4112) 44-91-54
Санатар буоллахха, тымныы уу ситимигэр ыытыллар үлэ графига "Водоканал" официальнай саайтыгар vodokanal-ykt.ru эбэтэр социальнай ситимнэригэр t.me/vodokanal_yakutsk, vk.com/vodokanal_yakutsk тахсар
Водоканал пресс-сулууспата биэрбит хаартыскалара
Сонуннар
Ордук ааҕаллар


