Эрэл букатын суох буолбатах

Чэппиэртэн саҕалаан нэдиэлэҕэ түөрт күн сарсыарда 9 чаастан киэһэ 19 чааска диэри аана сабыллыбат. Быйылгыттан чэпчэтиилээх араҥа улахан дьоҥҥо төлөбүрэ 350 солк. диэри үрдээбитин аахсыбакка, күннэтэ сүүстэн тахсалыы киһи сылдьар. Үйэ аҥаара холобурдаах саастаах эргэ дьиэ, биллэн турар, кыһалҕата ханна барыай?! Олохтоохтор кэпсииллэринэн, ааспыт нэдиэлэҕэ уулара бүтэн хас да чаас сабылла сылдьыбыт. Ол иннинээҕи нэдиэлэҕэ систиэринэлэрэ алдьанан үлэлээбэтэх. Ол, ол иннинээҕигэ – оһохторо алдьанан...

– Ээ, биһиги дьоммут маладьыастар! Итиччэ эргэ дьиэни куруук сылаастык, ыраастык туталлар. Ууларын эрэ кэмигэр кутталлар, оһохпут эрэ тулустар, үлэлэтиэхтэрэ. Баанньыкпыт барахсаны олохтоохтор бары даҕаны таптыыбыт, харыстыыбыт. Хайа, мантыбыт тохтоотоҕуна, хайдах буолабыт? – дэһэллэр Хатас олохтоохторо.

Тыа сиригэр, кырдьык, төһө да куораттан чугас олор, баанньыга суох сатаммаккын. Киһи барыта толору хааччыллыылаах дьиэтэ суох, баанньык оттор, уу куттарар үбэ-харчыта да кырыымчык. Ол да иһин куорат дьаһалтатын отчуоттарыгар, холобура, Хатас, Табаҕа олохтоохторо, үгэс курдук баанньык боппуруоһун көтөҕөллөр.

Бу күннэргэ куорат баһылыгын биэс сыллаах үлэтинэн отчуоттарга хатастаах табаҕалар эмиэ биир бастакынан баанньыктарын туруорсубуттар.

Дьыл-хонук уута-хаара суурайан, Сайсары, Рабочай городок баанньыктара көтүрүллэн, оннулара да суох. Балайда хойукка диэри «киирсэ» сатаабыт саамай аатырар паардаах Центральнай баанньык эмиэ көтүрүллэн, миэстэтигэр баараҕай гостиница тутулла турар. Онон Дьокуускай куорат үс эрэ уопсастыбаннай баанньыктаах олорор – Хатаска, Тулагыга уонна Залогка. Бары даҕаны ааспыт үйэтээҕи тутуулар. Залог баанньыгар куорат бүтүннүү кэриэтэ сылдьар. Нэһилиэктэртэн Табаҕаҕа баанньык суох. Маҕан эмиэ баанньыга суох. Мархаҕа муниципальнай баанньык кыһалҕатын 2024 сылга урукку «Факел» маҕаһыын дьиэтигэр суударыстыбаннай-чааһынай бииргэ үлэлэһии чэрчитинэн тутуллубут баанньык быһаарбыта. Маҕаннар, саталлар, куораттар – ити эҥэр барыта онно сылдьаллар. Оччолорго бу бачыым салҕаныахтаах курдук этэ эрээри, тоҕо эрэ Табаҕа да, Хатас да хайысхатыгар хамсааһын биллибэт. Чахчыта, Хатаска саҥа баанньыгы тутар учаастагы көрдүүллэрэ иһиллэр, «Звезда» диэн бэдэрээтчит да көстүбүт курдук. Чепалов уулуссатыгар үлэлиир Залог баанньыгын саҥа дьиэтин бырайыага судаарыстыбаннай экспертизаҕа сылдьыбыта хаһыс да сыла буолла. Онон, эрэл букатын суох буолбатах.

* * *

Хайа да үйэ кэллин, өрөбүл күн оччоттон баччаҕа диэри үгүстэргэ баанньыгы кытта ситимнээх. Чааһынай дьиэлээхтэр, онтуктарыгар  баанньыктаахтар, этэргэ дылы, эргиччи дьоллоох дьон! Дьоллоох эрэ буолуо дуо, быраастар, уйулҕаһыттар этэллэринэн, эттиин-хаанныын, куттуун-сүрдүүн доруобайдар. Итэҕэллээхтэр этэллэринэн – кыраам да аньыыта-харата суох ыраастар!

Доруобай буолуҥ!