Куорат баһылыгын талыы бэрээдэгэ бигэргэннэ

Куорат Дууматын бэрэссэдээтэлин бастакы солбуйааччы Евдокия Евсикова этэринэн, дьокутааттар быһаарыылара Дьокуускай олохтоохторугар толору аһаҕас буолуу бириинсибин өйөөтө.

“Биһиги “бэйэ-бэйэбититтэн тугу да кистиир кыахпыт суох” диэн итэҕэлгэ олоҕуран, аһаҕас куоластааһын пуорматын өйөөбүппүт. Быыбардааччылар иннилэригэр эппиэтинэһи сүгүүнү, итэҕэллэрин биһиги, дьокутааттар, бэйэбитигэр ылыахтаахпыт», — диэн Евдокия Евсикова тоһоҕолоото.

Евдокия Ивановна эбэн этэригэр, олохтоох бэйэни салайыныы, регламент уонна сокуон кэмитиэтин мунньаҕар бу боппуруоһу көрүү кэмигэр куорат уокуругун баһылыгын талар атын ньымалары эмиэ дьүүллэстилэр, ол иһигэр кистэлэҥ куоластааһыны уонна баар дьокутааттар ахсааннарынан баһыйар куолаһы ылыыны. Евдокия Евсикова бу тэрээһиҥҥэ норуоттан талыллыбыт хас биирдии дьокутаакка үрдүк эппиэтинэс сүктэриллэрин тоһоҕолоон бэлиэтээтэ: “Хас биирдии дьокутаат быыбардааччылар иннилэригэр үрдүк эппиэтинэстээҕин өйдүүрүн, онон быһаарыныы ылынарыгар, тус бэйэтэ эрэ талар буолбакка, куораппыт дьылҕатын быһаарар быраабы кинилэргэ итэҕэйбит тыһыынчанан олохтоохтор ааттарыттан таларын күүтэбит”.

Түмүккэ, Гордуума дьокутааттара СӨ Ил Дархана туруорбут хандьыдааттарыттан, аһаҕас куоластааһыҥҥа мунньахха баар дьокутааттар элбэх куоластарын ылбыт киһини куорат баһылыгынан таларга быһаарыы ыллылар.

Дьокуускай куорат Дууматын бэрэссэдээтэлэ Альберт Семенов бу ылыллыбыт быһаарыы түмүгүнэн, уларытыылары бэлэмнээһиҥҥэ болҕомто юридическай быраапка уонна куорат баһылыгын талыы бэрээдэгин чуолкайдааһыныгар ууруллубутун эттэ.

“Регламент куорат уокуругун баһылыгын Дьокуускай куорат Дууматын дьокутааттарынан талыы саҥа бэрээдэгин олохтуур. Онон көннөрүүлэр барылларыгар үлэ тэтимнээхтик уонна систиэмэлээхтик ыытылынна. Биһиги сыалбыт – бэрэстэбиитэллээх уорган үлэлииригэр чуолкай уонна өйдөнүмтүө бэрээдэги хааччыйыы”, — диэн бэрэссэдээтэл тоһоҕолоон бэлиэтээтэ.

Дьокуускай куорат Дууматын пресс-сулууспата