Куорат баһылыга сири атыылаһааччыларга угаайыга киирэн биэрбэттэригэр сүбэлээтэ

Дьокуускайга чааһынай дьиэни туттуон баҕалаах элбээн, манна сир учаастагын албыннаан, түөкүннээн атыылааччы эмиэ үксээбитин бэлиэтииллэр. Ону тэҥэ албын докумуоннаах, араас кыһалҕалаах,  хапытаалынай тутууну ыытарга көҥүлэ суох сир учаастагын атыылаан дьону эрэйгэ тэбээччилэр эмиэ бааллар. 
Аҕыйах хонуктааҕыта Дьокуускай куорат баһылыга Евгений Григорьев «Якутия 24» канал «ПРОденьги» биэриитигэр кытынна. Манна кэпсэтии биир сүрүн тиэмэтинэн сиргэ сыһыаннаах түөкүннээһини таарыйдылар, саарбах учаастактары атыылаһыыга киирэн биэрбэт туһугар хайдах дьаһанары кэпсэттилэр.   
"Чааһынай дьиэни туттарга эбэтэр кэмиэрсийэҕэ анаан сир учаастагын атыылаһаргытыгар докумуон дьиҥнээҕин бигэргэтэн ЕГРН-тан выписката сакаастааҥ. Ону таһынан атыылааччыттан бу сиргэ тугу тутуохха сөбө, туох бобуллара ыйыллар ГПЗУ – сир учаастагын градостроительнай былаанын көрдөөҥ”, – диэн Евгений Григорьев сүбэ быһыытынан эттэ.
Маны таһынан Евгений Николаевич сорох сири атыылааччылар өс киирбэх, итэҕэйимтиэ дьоҥҥо биир суобаһа суох быһыыларын – тыа хаһаайыстыбатынан дьарыктанарга анаммыт сири чааһынай дьиэни туттарга көҥүллээх диэн албыннаан атыылыыллара – баарын  кэпсээтэ.
“Итэҕэйиэ суохха наада, Дьокуускай куорат генеральнай былаана диэн баар – куораты сайыннарыы стратегическай былаанын көрөн уонунан сылларга ылыллар, ону ыллыҥ да уларыппаккын. Туох баар уларытыы бу генеральнай былааҥҥа сөп түбэһиннэрэн эрэ оҥоһуллуон сөп. Тыа хаһаайыстыбатынан дьарыктанарга анаммыт сири атыылаһыы бобуллубат, ол эрээри манна чааһынай дьиэни туттар быраапкыт суох буолар. Маннык сиргэ дьиэни туттарга, киллэрэргэ көҥүлү биэриэхтэрэ суоҕа, сокуонунан дьиэни регистрациялыыргыт эмиэ кыаллыбат. Учаастагы атыылаһаргытыгар хайаан да туохха тус сыаллаах анаммытын бэрэбиэркэлээҥ, градостроительнай былаанын сакаасттааҥ”, – диэн Евгений Григорьев бэлиэтээн эттэ.