Куорат баһылыга оскуолалар уонна дьиэлэр тастарынааҕы хаары ыраастааһыны бэрэбиэркэлээтэ

Бүгүн Дьокуускай куорат баһылыга Евгений Григорьев 7-с уонна 31-с нүөмэрдээх оскуолалар, ону сэргэ Пионерскай уулуссаҕа баар элбэх кыбартыыралаах мас дьиэлэр тастарыгар хаартан ыраастыыр үлэ хаамыытын көрдө. Баһылык кулун тутар ый хаары ыраастыыр үлэҕэ сүрүн кэм буоларын, бу өрөбүллэргэ Дьокуускай территориятыттан хаары тиэйии күүһүрдүллүбүтүн бэлиэтээн эттэ. 
"Уокуруктааҕы дьаһалта үлэһиттэрэ анал байыаннай дьайыы кыттыылаахтарын тэлгэһэлэрин хаарын ыраастыырга субуотунньугу ыыттыбыт. 80 тиэргэн хаара ыраастанан, хаар полигоҥҥа тиэйилиннэ. Куорат социальнай эбийиэктэриттэн 76 тыһ. тахса куб. м, үөрэх управлениетын линиятынан, оскуолалартан, оҕо уһуйааннарыттан, 14 тыһ. тахса куб. м хаар тиэйиллэрэ былааннанар. Управляющай хампаанньалар хаары тиэйэр үлэлэрэ куорат үрдүнэн күүһүрдүллэн турар", — диэтэ Евгений Григорьев.
Уокуруктааҕы дьаһалта Дьокуускай куорат олохтоохторугар чааһынай сектор хаарын ыраастааһын бас билээччи эбээһинэһэ буоларын санатар. Сэбиэскэй Армия 50 сыла уулуссаҕа баар полигоҥҥа хаары таһааран сүөкээһин төлөбүрэ суох.

 Дьокуускай уокуруктааҕы дьаһалтатын матырыйаалларынан