Дьокутааттар куорат бүддьүөтүн бастакы ааҕыыга ылыннылар

Бүддьүөт барылынан, 2026 сылга дохуот чааһа 17 422 мөл. солк. быһыллыбыт, ороскуот чааһа – 18 040 мөл. солк., диписиит кээмэйэ – 618 мөл. солк. 2027 сылга дохуот кээмэйэ 18 614 мөл. солк.; ороскуот – 18 684 мөл. солк., диписиит – 70 мөл. солк.. 2028 сылга дохуот уонна ороскуот чаастара 19 809 мөл. солк. былааннаммыттар.

Куорат бүддьүөтэ 22 муниципальнай бырагырааманы үбүлүүр.  

Чуолаан 2026 сылга бүддьүөт дохуоттаах чааһын кээмэйэ 2025 сыллааҕар 9 % элбэх былааннанан турар. Ааспыт сылларга курдук киин куорат бүддьүөтэ социальнай хайысхалааҕынан хаалар. Саамай үрдүк үбүлээһин үөрэхтээһин эйгэтигэр тыырыллыбыт – куорат бүддьүөтүн 42 %, ол эбэтэр 7,5 млрд солк. Бу сууматтан 122 мөл. солк. үөрэх кыһаларын хапытаалынай өрөмүөнүгэр ууруллубут, 320 мөл. солк. – терроризмтан көмүскэллээх буолууга.

2,2 млрд солк. национальнай экономика диэҥҥэ ууруллубут, манна суол инфраструктурата киирсэр.

2 млрд солк. олох-дьаһах хомунаалынай хаһаайыстыбатыгар көрүллүбүт. Манна куораты ыраастааһыны таһынан лиизининэн атыылаһыллар саҥа хомунаалынай тиэхиньикэ төлөбүрэ киирсэр.

Хаарбах уонна саахалланар туруктаах дьиэттэн көһөрүүгэ куорат 271 мөл. солк. былааннаабыт.

2026 сылга сүөһү иитиитин сайыннарыыга 17,1 мөл. солк., ол эбэтэр ааһан эрэр 2025 сыллааҕар икки бүк элбэх харчы көрүллүбүт.

Тыырыллар үбү сүөһү аһылыгар субсидияҕа, титииктэри тутууга, хапытаалынай өрөмүөҥҥэ, харайар баазаларга уо.д.а. туттуохтаахтар.

Санатар буоллахха, бүддьүөт бүтэһикиээх сыыппаралара өрөспүүбүлүкэ бүддьүөтүн ылыныы кэнниттэн ахсынньы ыйга биллиэҕэ.