Куорат бүддьүөтүн 60% үөрэхтээһин эйгэтин үбүлүүр

Ол курдук, Дьокуускай куорат бүддьүөтэ сылга 21 млрд солк. курдугу үөрэхтээһин эйгэтигэр көрөр.

Баһылык отчуоттарыгар иһитиннэрбиттэринэн, 2021-2025 сылларга киин куоракка 14 оскуола уонна 3 оҕо саада үлэҕэ киирбит, маны сэргэ 27 үөрэх кыһатын дьиэтигэр өтөрүнэн буолбатах хапытаалынай өрөмүөн ыытыллыбыт.

Аҥаардас быйыл Сэргэлээх шоссетыгар, урукку «Бинго» сайыҥҥы лааҕыр территориятыгар өрөспүүбүлүкэ бары муннуктарыттан доруобуйаларынан хааччахтаах оҕолорго аналлаах Арассыыйаҕа суох 550 миэстэлээх Адаптивнай үөрэхтээһин комплекса, Сайсары уокуругар Саха политехническай лицейгэ 326 миэстэлээх салҕааһын, «Спортивнай» түөлбэҕэ «Улыбка» оҕо саадын филиала үлэҕэ киирдилэр.

2026 сылга бу үлэ салҕанан, сэттэ саҥа үөрэх кыһатын үлэҕэ киллэрэри былаанныыллар: Адаптивнай үөрэхтээһин комплексын уһуйаана, Саҥа тутуллубут «Звезднай» түөлбэҕэ 315 миэстэлээх уһуйаан уонна 990 миэстэлээх оскуола, Ленин проспегар 1 №-дээх оскуола саҥа дьиэтэ, Пирогов уулуссатыгар 4 №-дээх анал коррекционнай оскуола дьиэтэ уонна икки спорт оскуолата.