Куорат 84 саастаах олохтооҕо үс нэдиэлэ курдук түөкүттэр сабыдыалларыгар сылдьыбыт

Ол түмүгэр мунньубут харчытын, 3 мөлүйүөн солкуобайы, сүтэрбитин туһунан ИДьМ Саха сиринээҕи пресс-сулууспата иһитиннэрдэ.

Барыта куттал суох буолуутун уорганнарын уонна Киин баан үлэһиттэрэ буолабыт диэн биллибэт дьон эрийиилэриттэн саҕаламмыт. Кинини счеттарыгар уорбаланар дьаһаллар бааллар диэн бастаан Москваҕа, онтон Санкт-Петербурга тиийэн харчытын курьердарга туттарарга итэҕэппиттэр. Ол туһугар түөкүттэр көтөр билиэтин атыыласпыттар, ол эрэн биэнсийэлээх сууматын бэйэтэ төлөөбүт. Ону тэҥэ кинилэри кытта өрүү сибээскэ сылдьарын туһугар эбии суотабай төлөпүөн атыылаһарыгар көрдөспүттэр. Кырдьаҕас мунньубут харчытын курьердарга туттарбытын кэннэ, ФСБ-тан ылыллыбыт сымыйа докумуоннары — харчы көһөрүү туһунан туоһу суруктары биэрбиттэр, онно харчы «үп-харчы регистрациятын ыытыыга» ылылынна диэн суруллубут.

Биэнсийэлээх киһи үс нэдиэлэ курдук — кулун тутар 18 күнүттэн муус устар 9 күнүгэр диэри түөкүттэр сабыдыалларыгар сылдьыбыт уонна соторутааҕыта эрэ полицияҕа сайабылыанньа биэрбит.

Полиция санатар: билбэт дьоҥҥо, ким да диэбиттэрин иһин, итэҕэйимэҥ, кинилэр ыйыыларынан үп-харчы дьыалатын оҥорумаҥ.