Куораппытыгар сымыыт сыаната үрдүү турар

Дьон сымыыты эрдэттэн хаһаанан кырааскалыыр түбүгэр түһэр эбэтэр кулич астыыр.

Биһиги кэллиэгэбит, YakutiaMedia кэрэспэдьиэнэ, куорат маҕаһыыннарыгар сымыыт сыаната бородууксуйа хантан кэлэриттэн уонна категориятыттан тутулуктанан уларыйарын бигэргэттэ. Ону ааҕааччыларбытыгар тиэрдэбит.

Хантан ылар барыстааҕый?

— Олохтоох көтөр фабрикатын бородууксуйата саамай удамыр сыаналаах буолан тахсар. “Токко” атыы-эргиэн бөдөҥ ситимигэр кыра сымыыттары уон устуукатын 145 солкуобайга атыылыыллар, оттон талыллыбыттар — 170 солкуобай кэриҥэ.

— Кэлии сымыыт сыаната ыарахан. Холобур, “Пятерочкаҕа” 224,99 солк., “Поярков” маҕаһыыныгар “дэриэбинэ” сымыыта 237,71 солк. Ол быыһыгар олохтоох сымыыт сыаната 157,08 солк.

Экспертэр бэлиэтииллэринэн, сымыыт сыаната оҥоһуллар сириттэн эрэ буолбакка, категорияттан эмиэ тутулуктаах: талыллыбыт (отборнай) сымыыт пиэрмэ эбэтэр кыра сымыыттааҕар хаһан баҕарар сыаналаах буолар. Ону таһынан, айаннаан кэлиитэ уонна Пасха иннинээҕи ирдэбил эмиэ сыанаҕа дьайар.

Бырааһынньык иннинэ сымыыт атыылаһар былааннаах буоллаххытына, олохтоох бородууксуйаҕа болҕомтоҕутун ууруҥ — чэпчэки эрэ буолбакка, сибиэһэйэ сыттаҕа. Улахан эбэтэр “дэриэбинэ” сымыыттарын ордорор дьон элбэҕи төлүөхтэрин наада, ордук тас дойдуттан аҕалыллыбыт буоллахтарына.

Санатар буоллахха, былырыын уон устуука сымыыт Дьокуускайга 130 солкуобайтан 168 солк. диэри халбаҥныыр эбит.