Куоракка орто анал үөрэхтээһин искибиэрэ түстэммитэ 10 сыла
Уон сыл анараа өттүгэр анал искибиэр түстэммитэ. Сэбирдэх көмүс солотуу өҥүнэн кутуллубут күһүҥҥү кэрэ күн Орто анал үөрэхтээһин тулаһата оҥоһуллубут үбүлүөйдээх күнүн үрдүк таһымҥа бэлиэтээтилэр.
Искибиэр, этэргэ дылы, ис-иһиттэн сырдаан, бырааһынньыктыы киэргэнэн, тупсан тоһуйда. Сарсыардаттан өҥнөөх- дьүһүннээх хаартыска истиэндэтэ, баннер туруоруллубута. Аар айылҕалыын ситимниир сиэл саламалар ыйаммыттар.
Киирээти кытта клумбаҕа өҥнөөх хатырыгынан «10 сыл» диэн ураннык уруһуйдаммыт ландшафтнай дизайн дьон болҕомтотун тарта. Бырааһынньык сүрүн ыалдьыттара, киэн туттуута — орто анал үөрэхтээһин бочуоттаах бэтэрээннэрэ, үйэ тухары оҕо иитиллиитигэр сыраларын уурбут үтүөлээх учууталлар.
Кинилэр уон сыл анараа өттүгэр бу искибиэр арылларыгар улахан өҥөлөөх СӨ орто анал үөрэхтээһинин бочуоттаах бэтэрээнэ Анна Афанасьевна Никифороваҕа ис сүрэхтэн махтаннылар сибэкки кэрэ дьөрбөтүн туттардылар, истиҥ эҕэрдэ тылларын анаатылар. Үөрүүлээх чааһы Инфраструктура колледжын дириэктэрэ Алексей Михайлович Бессмертнэй арыйда. Истиҥник эҕэрдэлээтэ. Салгыы Үөрэх министиэристибэтин бэтэрээннэрин Сэбиэтин Президиумун бэрэссэдээтэлэ Светлана Сергеевна Захарова итии-истиҥ тылларын анаата. Тэрээһин кэмигэр Строительнай уокурук быраабатыттан Иннокентий Николаевич Гермогенов бэтэрээннэргэ бэриниилээх үлэлэрин уонна уопсастыба олоҕор көхтөөх кыттыыларын бэлиэтээтэ, Махтал суруктары туттарда.
Бырааһынньыгы Култуура колледжын эдэр, таллааннаах устудьуоннарын ылбаҕай ырыалара киэргэттэ, бырааһынньык тыынын илэ- бааччы биэрдэ.
Бэтэрээннэр олохторун анаабыт эйгэлэригэр биир кэмҥэ үлэлээбит, ахтар-саныыр үөлээннээхтэрин сирэй көрсөн, кэпсэтэн, бэркэ диэн алтыһан, үөрэн-көтөн тарҕастылар.
Бу тэрээһин өссө биир ураты уонна ситими салгыыр кэрэ түгэнэ — бэтэрээннэргэ бу искибиэргэ үүннэриллибит яблоня, облепиха уонна акация уоспаларын (саженцы) бэлэхтээбиттэрэ буолла. Кырдьаҕастар үүнээйилэрин үөрэ-көтө дьиэлэригэр илдьэ бардылар. Бу маннык бэлэх искибиэр сылаас тыына хас биирдии дьиэҕэ тиийэрин уонна сайдарын туоһулуур.
Строительнай округ Бэтэрээннэрин Сэбиэтин бэрэссэдээтэлэ Раиса Макаровна Заболоцкая бу уон сыл тухары искибиэр тупсарыгар уонна сайдарыгар күүс-көмө буолбут дьоҥҥо, норуот дьокутааттарыгар, бырааба үлэһиттэригэр, техникум уонна колледж салайааччыларыгар муҥура суох махталын анаан туран, эҕэрдэ тылын эттэ.
Орто анал үөрэхтээһин искибиэрэ — бу уон сыл устата кураанахсыйар диэни билбэтэ. Манна өрүү интэриэһинэй тэрээһиннэр, маастар-кылаастар, ураты көрсүһүүлэр, аахсыйалар уонна быыстапка-дьаарбаҥкалар буолаллар. Быһата, олох оргуйар киин сирэ буолар.
Салгыы өссө сайдар уонна тупсар туһугар бэтэрээннэр Сэбиэттэрэ инникитин Саха сирин олохтоохторун көҕүлээһиннэрин өйүүр бырагыраамаҕа (ППМИ-2026) улахан бырайыак суруйан кыттар санаалаахтарын үллэһиннилэр.
Инникитин даҕаны бу күөх тупсаҕай сирбит үгүс көлүөнэ дьону түмэ, үөрдэ турарыгар баҕарабыт!
Сонуннар
Ордук ааҕаллар
