Куоракка бастакы автоматическай уу кутар ситими тардан эрэллэр

Кыайыы 80 сылынан киин куоракка Кыайыы болуоссатыгар тупсарыы үлэтэ салҕанар. Баһылык Евгений Григорьев куораты көҕөрдүүгэ сүбэһитэ Екатерина Павлованы кытта бэҕэһээ куорат уопсастыбаннай туонатыгар аан бастаан оҥоһуллар ууну автоматическайдык кутуу ситимин көрдүлэр.
Баһылык бэлиэтээбитинэн, Хабаров уулуссатын кыйа аны күһүн манна 15 устуука сэдэхтик көстөр күөх уонна 18 устуука көннөрү харыйа мас олордуллуоҕа. Бэлиэтээн эттэххэ, газону ыһыынан уонна маһы олордуунан анал үөрэхтээх дьон ылсыахтара. 
«Газону ыһыынан уонна олордуу мастарынан быйыл бэдэрээттээх тэрилтэ дьарыктаныаҕа. Кэнэҕэһин Губинскай уокурук управата бэйэтэ бэдэрээтчити наймылаһан үлэлэтиэҕэ. Тоҕо диэтэххэ маннык үлэнэн идэтийбит дьон эрэ дьарыктанар кыахтаах», – диэн быһаарар Екатерина Павлова. Ол туһунан Олохтоох дьаһалта пресс-сулууспата иһитиннэрэр.