Куобах рекорда 44 м 03 см тиийдэ!

«Туймаада» стадион манеһыгар буолан ааспыт Сахалыы атах оонньуутугар өрөспүүбүлүкэ чемпионатыгар cөҕүмэр көрдөрүү ситиһилиннэ. Тааттаттан Андрей Васильев куобахха толору уон биир ойууга 44 м 03 см түһэн, Саха сирин саҥа рекордун олохтоото! Сыллата кэриэтэ олохтуур бэйэтин рекордун 87 см куоһарда!

Эр дьоҥҥо Мэҥэ Хаҥаластан, Чурапчыттан, Тааттаттан, Намтан, Хаҥаластан, Горнайтан, Үөһээ Бүлүүттэн, Сунтаартан, Ньурбаттан, университеттан 23 кыттааччы, ол иһигэр 13 спорт маастара, 6 маастарга хандьыдаат туостан туоска кыырайталаатылар.

Кыайыылаахтар ойуулар биирдиилээн көрүҥнэригэр уонна абсолютнай чөмпүйүөн үс көрүҥ түмүгүнэн быһаарыллар буоланнар, уонна тэҥ баайыылаах күүстээх маастардар бааллара, сырыы аайы күрэхтэһии күүрээнэ үрдүк. Көрүҥ аайы илин-кэлин түсүһүүлэрдээх эрийсиилээх, кытаанах киирсиилэр болҕомтону тартылар.

Кылыыга ыстаҥа рекордсмена Кай Адамов (Горнай) 44 м 68 см түһэн бастаата, уһуну ойуу рекордсмена Игорь Скрябин (Мэҥэ Хаҥалас) 43 м 73 см – иккис,  Андрей Васильев (Таатта) 43 м 06 см көрдөрүүлээх – үһүс; ыстаҥаҕа Кай Адамов 45 м 33 см түһэн бастаата, Андрей Васильев 44 м 19 см хардаран – иккис, Игорь Скрябин 43 м 48 см түһэн үһүс үчүгэй көрдөрүүлэннилэр.

Абсолютнай чөмпүйүөн үрдүк аатын «куобах» быһаарыахтаах. Андрей Васильев күүстээх куобахчытын бары билэллэр. Икки көрүҥ түмүгүнэн Кай Адамов (2 м 76 см) инники иһэр. Дьэ, быһаарыылаах көрүҥ саҕаланар. Адамов дуу, Васильев дуу?! Бу иннинээҕи күрэхтэһиилэргэ кыайыылааҕы бу икки маастардар быһаарсаллара. Васильев маҥнайгы холонуутугар 43 м 26 см түспүтүн, Адамов 40 м 37 см түһүүнэн хардарар. Васильев 13 см инники түһэр уонна иккис холонуутугар 44 м 03 см түһэн, өссө лаппыйан эбэн биэрдэ уонна үс көрүҥ түмүгүнэн 131 м 28 см көрдөрүүлээх абсолютнай чөмпүйүөн буолбутун таһынан, саҥа сөбүлүүр куобаҕар рекорд олохтоото! Туох да күүрээнэ суох, олус холкутук ойуталаата. Кэрэ, дьикти уонна уһулуччулаах көстүүнү бэлэхтээтэ! Атах оонньуутун таптааччылар өссө көрүөхтэрин баҕалара улахан этэ да, салгыы барартан туттунна. Андрей Васильев тренерэ, атах оонньуутун спордун маастара Захар Евгеньевич Ефремов.

Итиччэ ыраахха Арассыыйаҕа уонна аан дойдуга да ким да ыстана илик. Саха атаҕын оонньуута сайдан иһэрэ үөрдэр. Үс ый кэриҥинэн Тааттаҕа буолар Манчаары оонньууларын иннинэ дьоһун көрдөрүү ситиһилиннэ. Куобах «буруолуу сылдьар» рекордсмена, атах оонньуутун муҥутуур кыайыылааҕа: “Кыахпын толору туһамматым, көрдөрүүбүн өссө эбиэм, ыраатыннарыам!” – диэбитэ кэрэхсэбиллээх. Түөртүү миэтэрэни кылыыһыттар уонна ыстаҥаһыттар эрэ ойоллоро. Куобахчыт Андрей Васильевы эҕэрдэлиибит!

Дьахталларга Валерия Олесова (Хаҥалас), бэтэрээннэргэ 35-49 саастаахтарга Андрей Софронов (Чурапчы), 50-н үөһэ саастаахтарга Владимир Софронов (Чурапчы) бастаатылар.

Ытык Күөлгэ Манчаарыга үрдүк көрдөрүүлэрдээх, сэргэх атах оонньуута буолуоҕа.