Куобах кулгааҕыттан саҕынньах

Үгүс сонун экспонат быыһыгар  тоотойбут кыракый оҕоҕо аналлаах саҕынньахха киһи хараҕа тута хатанар.   Үс саастааҕар киниэхэ анаан  куобах кулгааҕыттан аттаран тигиллибит саҕынньаҕы Амма улууһун Эмис нэһилиэгиттэн хаһаайката ааттаан-суоллаан кэлэн быыстапканы көрө сылдьарын көрсөн кэпсэттибит:

 Софья Петровна Устинова, элбэх сиэн, хос сиэн эбээтэ.

 – Бииргэ төрөөбүттэрбэр саамай улаханнарабын. Мин кырабар Наахараҕа олорор эрдэхпитинэ Феодосия Устинова диэн Тиэлигиттэн төрүттээх саҥастаах этибит. Таайым кэргэнэ. Кинини биһиги эбээбит курдук саныырбыт. Иистэнньэҥ этэ. Дьэ, бу саҕынньаҕы үс саастаахпар миэхэ анаан тикпит үһү. Ол аата 77 сыл анараа өттүгэр эбит. Оччотооҕуга куобаҕы туһахтаан бултууллара. Тириитин сүлэн ылан эмиэ таҥас-сап тигэн эрдэхтэрэ. Бука, арааһа бэргэһэ, үтүлүк, кэтинчэ иһэ буолуо... Саҕынньах туруга билигин да үчүгэй. Саҕынньах бэйэтэ куобах кулгааҕыттан, кытыыта тииҥ тириититтэн тигиллибит. Мин кэннибиттэн ким да кэппэтэх. Ийэм сундуукка харайан уура сыппытын булан, кэлин сиэммэр кылгастык кэтэрдэн ылбыттаахпыт.

Бу саҕынньаҕым историяҕа киирэр сүдү кинигэҕэ  киирбититтэн сүрдээҕим үөрдүм, долгуйдум. Нэһилиэкпит кулуубун дириэктирэ Анжелика Александровна Ивановаҕа бэйэм, оҕолорум, аймахтарым ааттарыттан махтанабын. История кэрэһитэ буолан сиэннэрим, хос сиэннэрим көрө сылдьыахтара диэн эбээ киһи буоларым быһыытынан, сэмээр үөрэбин.