Кулун тутар 8 күнүгэр «Король» такси кэрэ аҥаардарга босхо айаны бэлэхтиир!

- Эчикийэ, үчүгэйин!
- ⁠Тоҕо бэрдэй! Бу ханна?

«Киин куорат» ааҕааччыларын бу сааскы, чаҕылхай күнүнэн эҕэрдэлээн туран, киһиэхэ үтүө сыһыан, сылаас  болҕомто тула сэһэргэһиини сэргээҥ диэн ыҥырар.

... Бүгүн кулун тутар 8 күнэ. Ол аата Роберт Григорьевич төрөөбүт күнэ. "Буруйдаах" киһи быһыытынан кини бүгүн хаһааҥҥытааҕар да эрдэ туран, гарааһын оһоҕун оттон киирдэ. Ол кэннэ аны массыынатын кылбаччы сотон, бырааһынньыктыы киэргэтэн, чахчы да, "Король" такси диэх  айылаах тупсарда. Былааннаммытын үмүрүтэн дьиэтигэр киирбитэ, алаадьы сыта дууһатын ортотунан киирдэ.

Кэргэнэ Лена Захаровна хобордоохтон саһарчы буспут алаадьыларын хостуурун быыһыгар: "Чэ, кытаат, түргэтээ. Суун-тараан уонна үчүгэйдик аһаан  барыаҥ этэ", - дии тоһуйда. Алгыстаах алаадьылар остуолу булааттарын кытта хаһаайка күөрчэҕин үрдүгэр түстэ. Ытыкка биһилэҕэ охсуллар тыаһа Роберт Григорьевичка ийэтин санатта.
Сып-сылаас алаадьыны субу оҥоһуллубут күөрчэххэ умньаан сии, буруолаабытынан эт миинин иһэ олорон, кыл түгэнэ оҕо сааһыгар тиийэ оҕуста.
63 сыл анараа өттүгэр бу күн араадьыйаҕа Ольга Иванова-Сидоркевич ырыатынан саҕаланар буолара.
- Роберт Григорьевич, ийэҕэр бастакы бэлэҕиҥ туох этэй?
- Бу санаатахпына, маҥнайгы бэлэхпин бастакы кылааска үөрэнэ сылдьан туттарбыт эбиппин. Куобах уруһуйдаабытым уонна  адаархай буочарбынан "8 Марта" уонна "Маме" диэн  суруйбутум. Ийэм олус үөрбүтүн бу баардыы өйдүүбүн ээ...
- Таксигын тоҕо "Король" диэн ааттаабыккыный?
- Ээ, дьон бэйэтэ иҥэрбит аата. Мин да ону сирбэппин. 
Икки сыллааҕыта "Королла" массыына ылыммытым уонна "Такси королла предлагает услуги" диэн биллэрии таһаарбытым. Дэриэбинэҕэ саастаах таксист мин эрэ баарбын. Онон "Такси "КОРОЛЬ" диэ", - диэбиттэрэ. Ити курдук бэйэтэ тахсан кэлбитэ. Дэриэбинэбит чөкө, барыта чугас-чугас турар. Дьыссаакка оҕону салаасканан да, көтөҕөн да илдьиэххэ сөп.  
Ону оҕолор төрөппүттэригэр "Такси "Король" ыҥырыҥ дии олороллор үһү. Хайыахтарай, ыҥырар буоллахтара дии. Дьэ итинник, оскуолаҕа, дьыссаакка, үлэҕэ барааччылар - мин эрдэһит килийиэннэрим.
Уопсайынан
дьон көрдөстөҕүнэ аккаастаабат киһибин. Кыһалҕалаах буолан эрийэллэр буолуо, ону толорботохпутуна төрүт табыллыбат курдук буолар ээ. Саастаах өттүлэригэр ыарахан суумкаларын дьиэлэригэр киллэрэн биэрэбин. Дьоҥҥо үтүөнү оҥорор туох куһаҕаннаах буолуой?!
Таксист куруук хайҕабылга сылдьыбат, сэмэлэнии да баар, онон бу үлэҕэ тулуур наада. Оттон кулун тутар 8 күнэ - миэхэ ураты күн. Төрөөбүт күммэр дэриэбинэм, Амма Эмис нэһилиэгин иһинэн кэрэ аҥаардарга босхо айаны бэлэх уунар үгэстээхпин.
Быйыл эмиэ бу үтүө үгэспин үөрэ-көтө толороору, бастакы төлөпүөнү күүтэн олоробун.
Бу кэрэ, сырдык күнүнэн кэрэ аҥаардары барыларын эҕэрдэлиибин! 

                     ***

Бачча үчүгэй тылларынан сэһэргэһиибитин түмүктээн, билэр кыыспар Эмискэ төлөпүөннээн, бу таксига олорсор былаанын ыйыталаспыппар:
- Кулун тутар 8 күнүгэр сыл аайы "Король" такси кэрэ аҥаардары босхо таһара үтүө үгэскэ кубулуйда. Онон субу такси сакаастаары олоробун. Роберт Григорьев ити курдук олус абыраллаах, үтүө санаалаах суоппар, элбэх оҕолоох аҕа, эһээ. Бэйэтэ ону ааһан гармонист. Нэһилиэкпитигэр биир олус көхтөөх позициялаах киһибит, - диэн буолла.

               ***

Маннык үтүө санаалаах таксист  Сахабыт сирин араас муннугар бу күҥҥэ, бу чааска сүүрэ сылдьар массыыналаах эр хоһууннарга үтүө холобур буолуохтун!