Кулун тутар 5 күнэ - Саха таҥаһын күнэ

Бу кyн быйыл эмиэ үгэс курдук араас улуустартан үгүс дьон түмүстэ. Иистэнньэҥнэр бары сатабылларынан тигиллибит, араас дьэрэкээн киэргэллээх, истээх кыһыҥҥы соннорун кэтэн, Орджоникидзе болуоссатыттан Ленин болуоссатыгар диэри сэлэлии хаамыыга көхтөөхтүк кытыннылар.

Өрөспүүбүлүкэ араас муннуктарыттан биһиги "үрүҥ көмүс" волонтердарбыт эмиэ көхтөөх кыттыыны ылан, сүргэбит көтөҕүлүннэ. Бүгүҥҥү тэрээһин сүрдээх элбэх кэрэ түгэннэрдээх, олус интириэһинэй буолла. Сэлэлии хаамыы кэнниттэн, "үрүҥ көмүс" волонтердар мустан, СВО байыастарын ийэлэрбитин Аан дойду дьахталларын күнүнэн эҕэрдэлээтилэр. "Дууһабытынан эдэрбит" түмсүүбүтүгэр 30-н тахса ийэ, эбэ оҕолоро, сиэннэрэ байыаннай дьайыыга сылдьаллар. 
Түмсүүбүтүгэр ырыаһыт кыргыттардаахпыт үчүгэйэ бөҕө, Светлана Мачахова, Людмила Леонтьева киһи эрэ истэ олоруох куоластаахтар, буолар тэрээһиннэри наар киэргэтэллэр. Томмоттон биир санаалаахпыт Мария Протопопова-Намыына куо анаан-минээн ыҥырыллан кэлэн, бырааһынньыктааҕы күммүтүн олус тупсарда. Кыргыттар күүстээх аҥаардарын, түмсүүбүт кыттыылаахтарын илдьэ кэлбиттэрэ, тэрийэн ыыппыттара күүстээх сомоҕоһуулаахпыт туоһута буолла дии санаатым. Ыраах сирдэртэн "үрүҥ көмүс" волонтердарбыт: Ньурбаттан Валентина Егорова уонна Уус Алдан Найахытыттан Галина Чукрова биир санаалаахтарын илдьэ кэлэн, итии чэйдээх остуол тула олорон билистибит, ирэ-хоро кэпсэттибит, ону ааһан, Калмыкия "үрүҥ көмүс" волонтердарын кытта онлайн көрүҥүнэн санаа үллэһиннибит. Истиҥник кэпсэтэн, сахалар, калмыктар таҥастарын көрдөрөн кэпсээтибит. 2016 сылтан бииргэ үлэлэһэр коррекционнай оскуолаттан сиэннэрбитин Филиппова Анна Валерьевна калмыкияларга билиһиннэртээтэ, оҕолор сахалыы таҥастарын бэйэлэрэ тигэллэрин уонна сахалыы таҥастаах кэлэн көрдөрдүлэр. Чикишев Ваня хомуска оонньуура өссө тупсубут, сайдан иһэрэ үөртэ, оонньоон астыннарда. Маладьыастар, этэҥҥэ өссө үүнэ, элбэҕи билэ-көрө турдуннар! Калмыкиялар бэйэлэрин омуктарын таҥаһа эмиэ сүрдээх суолталааҕын иһиттибит, өссө боппуруостары биэрэн, төһө өйдөөбүппүтүн ыйыталастылар. Билэн, өйдөөн хаалбыппытыттан үөрдүлэр. Оҕолор ону көрөн бэйэлэрин билиилэригэр эбиннилэр. Көрдүлэр, иһиттилэр, бэйэлэрин көрдөрөн сөхтөрдүлэр үөртүлэр даҕаны.  

Инникитин да Валентина Васильевна салайыытынан биир сомоҕо, биир санаалаах "Үрүҥ көмүстэр" "Дууһабытынан эдэрдэр" буоларбытынан, өйдөһөн, өйөһөн тэрийэр тэрээһиннэригэр көхтөөх буола туруохпут дии саныыбын. 
Бука бары чэгиэн, доруобай сылдьыаҕыҥ!
Биһиги, Валентина Васильевна түмүүтүнэн, эдэр ыччат көлүөнэбитигэр, оҕолорбутугар, сиэннэрбитигэр сомоҕолоһуубутунан үтүө холобур буолабыт! Бука бары түмсүүбүт  кыттыылаахтарыгар махтанабын! Түгэнинэн туһанан Дьахтар хамсааһынын 100 сылынан эҕэрдэлиибин. Бу хамсааһыҥҥа бары кылааппытын киллэрсэ сылдьабыт.