Кулун тутар 1 күнүттэн киирэр сокуоннар

Авиацияҕа саҥа быраабылалар

Билиэттэри төннөрүү испииһэгэ:

• пассажирга билиэккэ ыйыллыбыт сөптөөх хааччыйыыны биэрбэтэх;

• тиэйээччи эбэтэр боломуочуйалаах агент билиэти сыыһа толорбут;

• көтүү 30 мүнүүтэттэн ордук хойутаабыт;

• рейс былааннаммыт бириэмэтин иннинэ көппүт;

• чугас аймах ыалдьыыта.

Хойутааһын кэмигэр өҥөнү оҥоруу болдьоҕо чуолкайданна. Авиахампаанньалар пассажирдары хааччыйар эбээһинэстээхтэр:

• иһэр уу – икки чаас кэтэһии кэнниттэн биир чаас иһигэр, ол аата былааннаммыт айан бириэмэтиттэн үс чаас кэнниттэн;

• итии аһылык – кэтэһии бастакы түөрт чаас кэнниттэн икки чаас иһигэр;

• гостиницаҕа олордуу – күнүс аҕыс чаас кэтэһии кэнниттэн икки чаас иһигэр уонна түүн алта чаас кэтэһии кэнниттэн икки чаастан хойутаабакка.

Арассыыйа иһигэр эконом-кылаас авиабилиэтигэр 50% чэпчэтии оҕолорго төрөппүттэриниин эрэ буолбакка, ханнык баҕарар улахан киһини кытта биирдэ сакаастаатахтарына эмиэ бэриллиэҕэ. Ону таһынан, 12-гэр диэри саастаах оҕолоох ыалларга эбии төлөбүрэ суох аттыгар миэстэ бэриллэр.

Микрозаймнар уонна биометрия

Микрозайм биэрии быраабылата кытаатыаҕа. Кулун тутар 1 күнүттэн микрофинансовай хампаанньалар албыннааһыны утары охсуһар сыалтан 1 мөлүйүөн солкуобайга диэри суумалаах онлайн кирэдьиити биэрэр түгэннэригэр кирэдьиит ылааччылары Биир кэлим биометрическай систиэмэ (ЕБС) нөҥүө бэрэбиэркэлиэхтээхтэр.

Суоппар оскуолатыгар үөрэтии

В категорияҕа ирдэнэр практическай чаас ахсаана 38-тан 42-гэ диэри элбиир. Маныаха автооскуолалар теоретическай уруоктары ыраахтан ыыталларын официальнайдык көҥүллээтилэр.

С уонна D категориялаах лицензияҕа, ону тэҥэ таксилыырга үөрэниэн баҕалаахтар (В категория) автооскуолаларга эрэ буолбакка, такси хампаанньаларыгар эбэтэр анал тырааныспар тэрилтэлэригэр үөрэнэр кыахтаныахтара.

Үлэ кодекса

Үлэ биэрээччилэр омук үлэһиттэрин ахсаана олохтоммут регионнааҕы квоталары эбэтэр хааччахтааһыннары аһардаҕына үлэлэриттэн ууратар сокуоннай бырааптаах буолуохтара. Бу иннинэ Арассыыйа Үлэ кодексыгар омук үлэһитин кытта үлэ дуогабарын тохтоторго төрүөт быһыытынан федеральнай хааччахтааһыннар киирэллэрэ.

Алименнар уонна биир кэлим босуобуйа

Биир кэлим босуобуйаны аныырга оҕо алименын төлөбүрүн ааҕыы бэрээдэгэ уларыйар. Сүрүн уларыйыы, арахсыбыт, ол гынан баран оҕо алименын суутунан быһааттарбатах эбэтэр суут бирикээһэ суох төрөппүттэргэ сыһыаннаах. Билигин дьиэ кэргэн дохуотун ааҕыыга  оҕо алименын алын суумата МРОТ-ка буолбакка, ааспыт сыллааҕы регион ыйдааҕы орто номинальнай хамнаһын кытта ситимнээх.

Нуучча тылын харыстааһын

Рекламаларга, бэлиэлэргэ, ыйынньыктарга уонна ырыынакка бородууксуйаны ойуулааһыҥҥа омук тылларын туттууга кытаанах хааччахтар киирэллэр. Кулун тутар 1 күнүттэн саҕалаан саҥа олорор дьиэлэр ааттара кириллицанан эрэ суруллуохтаах.