Куһаҕан дьаллыгы утары үлэ түмүктэрин Арассыыйа экспертэрэ сэҥээрэллэр

Куорат баһылыга Евгений Григорьев арыгылааһыны, табахтааһыны, наркоманияны утары үлэ ситиһиилэрин Арассыыйа таһымнаах экспертэри кытта үллэстибитин иһитиннэрэр.
Ол курдук, Андрей Головин, Евразия доруобуйаҕа ассоциациятын генеральнай дириэктэрэ, Аан дойдутааҕы чөл олох академиятын бэрэсидьиэнэ, уонна Илья Пронин, ыччат ортотугар арыгылааһыны, табахтааһыны уонна наркоманияны сэрэтиинэн дьарыктанар, дойду араас регионнарыгар салаалардаах «Общее дело» хамсааһын координатора, кыттыылаах көрсүһүүгэ сылдьан Дьокуускай куорат уопутун үллэстибитин суруйар.
«5 сыл иһигэр Дьокуускай куоракка арыгы маҕаһыынын ахсаана 337-тэн 240-ҥа диэри – 30% аҕыйаата. Арыгыны иһии биир киһиэхэ тиксэр өлүүтэ, итирик туруктаах буруйу оҥоруу, уруулга олоруу кээмэйэ эмиэ намтаата.
Маныаха, иккис өттүнэн, спордунан уонна физкултууранан дьарыктанар усулуобуйаны тэрийии сабыдыаллаабыт буолуон сөп. Бу этэр 5 сылбыт устата 3 ДЮСШ, 3 оскуолаҕа спорт саалата тутуллан үлэҕэ киирдилэр, урукку ДЮСШ-ларга уонна спорт эбийиэктэригэр өрөмүөн ыытылынна. Саҥа тутуллар «Спортивнай» түөлбэҕэ өссө биир саҥа ДЮСШ уонна Губин уулуссатыгар дзюдо саалата үлэҕэ киирээри тураллар. 
40 уулуссаҕа спорт былаһаакката, воркаут былаһаакка туруорулуннулар. 
Бу түмүгэр 5 сыл иһигэр спордунан уонна физическэй култууранан  утумнаахтык дьарыктанар киһи ахсаана 46 тыһыынчанан эбиллэн, 192 тыһыынчаҕа тиийдэ. 2021 сыллаахха куорат ДЮСШгар 4,7 тыһыынча оҕо даьрыктанар эбит буоллаҕына, бу сыыппара билигин 8 тыһыынчаҕа тиийэн турар.
Салгыы даҕаны кыаҕым тиийэринэн биһиги куораппыт чөл бүгүҥҥүтүн уонна чөл сарсыҥҥытын туһугар үлэлэһэр былааннаахпын», – диэн суруйар Евгений Григорьев. https://t.me/EvgenyGrigorev/3477