Крыса өлбүт уутунан аһатан турардаахпыт

Остолобуойга үксүн дьахталлар үлэлииллэрэ. Сэбиэдиссэйбит олус кыһамньылаах, улахан былаастаах, тойон-хотун диэн толлон турбат уонна үлэтигэр олус бэриниилээх, тэрийэр, дьаһайар дьоҕурдаах этэ. Биһиги кинини убаастаан “Эдьиэйкэ” диэн ааттыырбыт.

Кыракый остолобуой дьиэбитин оһоҕун оттон улахан аһы – хортуоппуйу, миини, ууну-хаары онно оргутарбыт, буһарарбыт. Оттон атынын духуопкаҕа, билиитэҕэ астыырбыт. Ол нэһилиэгим чугаһыгар улахан ыскылаат баара: соҕурууттан, куораттан уотурбаны, бурдугу, оройуон маҕаһыыннарыгар кэлэр табаары барытын баржанан тимир контейнердарга аҕалаллара. Ол баржаны кытта крысалар кэлэн ыаллары ыһан кэбиспиттэр этэ. Дэриэбинэҕэ чыс кутуйахтан атын суох буоллаҕа. Онон крыса диэн уһун кутуруктаах, кутуйахтааҕар улахан, киһиэхэ да саба түһэр сүрдээх “кыыллар” кэлэн дьону ууга-уокка түһэрбиттэрэ.

Сарсыарда остолобуойбутугар кэллэхпитинэ иһити-хомуоһу үлтү сыспыт, ыспыт, алдьаппыт буолаллара. Бирээмэ сыыҥкабай бодунуоһу кытары кэбийэллэрэ.

Мин каассаҕа олорон үлэлиирим. Биирдэ остуолум анныгар илиибин уган кумааҕы ылаары гыммыппар арай крыса ойон тахсан моонньубар түһэн ыһыы-хаһыы буолан, оробуочай уол сүүрэн кэлэн, бары уоскутан турардаахтар. Аны дьон кэлэн аһыы олордоҕуна наһаа куһаҕаннык чыыбырҕаһаллар, киһи куйахата күүрүөх саҥалаахтар этэ.

Уубутун “Вода” массыынанан куттарарбыт. Аччаата да кэлэн толору кутан иһэр. Онтон мииммитигэр, мохоруоммутугар, чэйбитигэр, уопсайынан аспытыгар барытыгар туттар буоллахпыт. Биирдэ массыына кэлэн биэрбэккэ, буочукалаах уубут бүтэн, арай түгэҕин көрбүппүт хас да крыса түһэн өлө сыталлар эбит. Дьэ, биһиги “бабат-татат” бөҕө буоллубут ээ. Сэбиэдиссэйбит туох да улахан саҥалаах, бэйэтэ уһаат иһигэр саҥарар курдук, хаһыы-ыһыы буола түстэ. Онон, дьоммутугар, үксүн айан суоппардара, чох тиэйээччилэр сылдьаллара, крысалаах аһы аһатан турабыт. Ол барыта кимиэхэ да кэпсэммэккэ, “ылы-чып” хаалбыта.

Билигин кэлэн күлсүбүппүт иһин, хата, ким да сүһүрбүтэ иһиллибэтэҕэ, сылдьыбыттарын курдук сылдьан, аһаан, махтанан аҕай бараллара.