«Космос» гостиница 2027 сылга үлэҕэ киириэҕэ

Киин куорат Чернышевскай уулуссатыгар тутуллар «Космос» Уһук Илиҥҥэ бастакы түөрт сулустаах гостиница тутуутун Ил Дархан Айсен Николаев билистэ уонна эбийиэги 2027 сыл эргэтигэр үлэҕэ киллэрэргэ сорудахтаата. 
Аны күһүҥҥээҥҥэ диэри 13 мэндиэмэннээх эбийиэк икки аллараа этээһин каркааһа бэлэм буолуохтаах.

Бэлиэтээн эттэххэ, гостиница уопсайа 148 хостоох, ол иһигэр доруобуйаларынан хааччахтаах дьоҥҥо аналлаах нүөмэрдэрдээх. Манна офистар, эрэстэрээн, лобби-бар, фитнес-саала, сауна о.д.а. баар буолуохтара. Тутуу уопсай иэнэ 9 тыһ. кв/м тэҥнэһэр. 
Тутуу тас көстүүтэ эмиэ ураты буолуоҕа, аныгы архитектураны сахалыы оһуор, сэргэлэр байытан биэрэллэрэ күүтүллэр. Тутууну «Центр» СДК ыытар, учредителлэринэн «Туризм.РФ» корпорация, Cosmos Hotel Group уонна «Центр» УК («РИК» бөлөххө киирэр) буолаллар, диэн «Эхо столицы» сайта иһитиннэрэр.
Киин куоракка туризм сайдарыгар олук ууруохтаах, билиҥҥи кыһалҕаны быһаарарга төһүү күүс-көмө буолуохтаах аныгылыы дьоһун тутуу Чернышевскай уул., 8/3, туристар ордук сөбүлээн тоҕуоруһар сирдэригэр Кырдьаҕас куорат таһыгар, Өлүөнэ эбэни өҥөйө тутулларын суруйан турабыт. 
Санатан эттэххэ, Cosmos Hotel Group гостиница ситимэ Арассыыйа 20 регионугар 36 гостиницалаах. Дьокуускайга тутуллуохтаах отель Уһук Илиҥҥэ бастакы буолуоҕа. Итиэннэ Туризм.РФ Корпорация өйөбүлүнэн, дойду Бэрэсидьиэнэ Владимир Путин көҕүлээһининэн биллэриллибит «Туризм уонна ыалдьытымсах буолуу» национальнай бырайыак иитинэн  олоххо киирэр.
Саҥа эбийиэккэ аҕыйаабыта 73 үлэ миэстэтэ арыллара былааннанар. Гостиница комплекса үлэҕэ киирдэҕинэ, сылга 50 тыһыынча ыалдьыты түһэрэр кыахтаныаҕа.

Хаартыска: Ил Дархан уонна Бырабыыталыстыба пресс-сулууспата