Коррекционнай оскуола тутуута 2026 сылга түмүктэниэҕэ

Арассыыйа үөрэҕин миниистирин солбуйааччы Андрей Николаев Саха сиригэр кэлэ сылдьан Дьокуускай куорат Пирогов уулуссатыгар 4 №-дээх анал коррекционнай оскуоланы тутуу хаамыытын билсэн барбыта.
Саха Өрөспүүбүлүкэтин бырабыыталыстыбатын уонна «ПроШкола №25» ХЭУо икки ардыларыгар түһэрсиллибит концессионнай сөбүлэҥ быһыытынан ыытыллар тутуу бырайыак-смета докумуоннарын оҥоруу уонна судаарыстыбаннай экспертизата уһаан, атахтанан турар. 
«Хаттаан көрүөххэ наада. Ураты, наадалаах эбийиэк. Хонтуруолга туруорабыт. 2026 сыл от ыйын 30 күнүгэр үлэҕэ киллэрэргэ былаанныахха», – диэтэ Андрей Викторович.

180 миэстэлээх оскуола үс мэндиэмэннээх дьиэтэ Пирогов уул., 2 тутулла турар. Манна хас биирдии этээскэ уоннуу оҕону батарар алталыы кылаас тэриллиэхтээх. 
Маҥнайгы этээскэ гардероб, 90 миэстэлээх остолобуой, мастарыскыай, медицинскэй блок, биирдиилээн оҕону кытта дьарыктанар кабинет баар буолуохтара.
Иккис этээскэ 100 миэстэлээх универсальнай саала, психолог, дефектолог, логопед хосторо, Монтессори кабинета, опенспей хабааннаах учууталлар хосторо баар буолуохтара. Спорт зонатыгар тренажердардаах трансформер кабинет, хореография саалата, тренердэргэ, снарядтары уурарга аналлаах хостор былааннаналлар.

Үһүс этээскэ административнай блок, ааҕар саалалаах библиотека, кинигэ уурар хос, информатика, робототехника кабинеттара, ИЗО, туойунан дьарыктанар, атын да илии оҥоһуктарын оҥорор кабинеттар, социальнай-бытовой үөрүйэхтэри иҥэрэр устуудьуйа тэриллиэхтэрэ, диэн Үөрэх министиэристибэтин саайтыгар суруйаллар.