Коркин турнирыгар күүһү-кыаҕы көрүнүү

Сэтинньи 7 күнүгэр «Триумф» уораҕайыгар бөҕөстөрбүт бэлэмнэрин, туруктарын тургутар «хонтуруоллуур хапсыһыылар» буолан аастылар. 100-чэкэ тустуугу биир кэккэҕэ туруоран, СӨ сүүмэрдэммит хамаандатын сүрүн тренердэрэ В.Э. Семенов, Е.Т. Пономарев, Нь.Е. Сергин, П.М. Малардыров, А.Г. Макаров хапсыһыылар сыалларын-соруктарын билиһиннэрдилэр. Эрчиллии-бэлэмнэнии хаамыытын өрөспүүбүлүкэ тустуутун салайааччылара, суруналыыстар кэтээн көрдүлэр-иһиттилэр. СӨ сүүмэрдэммит хамаандатын бэлэмниир Киин быраастара эмиэ бааллар. Эркиҥҥэ турар улахан экраҥҥа ааспыт Коркин турнирдара көрдөрүллэн, кыайыыларга кынаттыыллар.

Көбүөргэ күүстээх үлэ оргуйар!

Биир кэлимсэ тэлгэммит аҕыс көбүөргэ эти-хааны сылытыы, сүһүөхтэри-быччыҥнары имитиилэр чаас аҥаарын кэриҥэ бириэмэни ыллылар. Билигин тахсыылаахтык туста сылдьар Лев Павлов, Любомир Ашеин, Федор Постников, Алексей Копылов, Арыйаан Тютрин, Александр Авелов, Айаал Белолюбскай, Егор Явловскай, Петр Константинов, Владимир Бояновскай, Константин Капрынов, Роман Николаев, Олег Фомин, Игорь Матвеев, Андриан Ленскэй, Никита Софронов, Никита Хабаров, Евгений Аронов уо.д.а. курдук ааттарын-суолларын соргулаахтык иһитиннэрбит 57-125 кг бөҕөстөр бары баалларыттан уонна Р.М. Дмитриев аатынан Олимпийскай эрэл училищетын эдэр бөҕөстөрө элбэхтэриттэн сылыктаатахха, Коркин турнирыгар улахан суолта ууруллубут. Эрдэ кэлбит ыалдьыттарбыт монголлар бааллар. 

Бөҕөстөр тустаах тренердэрэ Н.Н. Рожин, А.К. Константинов, С.П. Сивцев, П.С. Иванов, Г.С. Игнатьев, И.И. Дмитриев, Б.Г. Яковлев, В.Н. Кириллин, А.А. Сивцев, Ньурбаттан тиийэ кэлбит И.В. Бурнашев, адаптивнай спортан В.Е. Стручков, монголлар тренердэрэ уо.д.а. былаһын тухары уолаттарын аттыларыгар сүбэлии, ыйа-кэрдэ сырыттылар.
  
Күннэригэр, күннээн-күөнэхтээн туста сылдьар тустуук уолаттарбыт бэрт сылбырҕатык, хотоойутук көрөллөр-истэллэр. Быччыҥнара, иҥиирдэрэ лаһыгырыырга дылы. Киһи хараҕа үөрэр. Хас хамсаннахтарын аайы илиилэрин-атахтарын, систэрин, тараһаларын, кэтит түөстэрин, дараҕар санныларын быччыҥнара сүүрэлиир. Уунаҥнатан түһэн имигэстэрэ сүр. Бэйэлэрин ыйааһыннарыгар хастыы да хапсыһыыны оҥортоотулар. Сирэйдэрэ-харахтара сытыы, тутталлара-хапталлара эрчимнээх. Халыҥ ааттаах-суоллаах, күүстээх тустууктар бэйэ-бэйэлэрин кытта күөн көрүстүлэр. Өрдөөҥҥүттэн төһө да билистэллэр, саҥа күөн көрсөн эрэрдии тутталлар-хапталлар. Баар сатабылларын, туохха бэлэмнэммиттэрин көрдөртөөтүлэр. Утарсыы, көмүскэнии баарын үрдүнэн, чыпчылҕан түгэнэ атахха киирэллэр, атахтата сылдьан утары эриллэн ордук балаһыанньаланаллар, албаска киллэрэн, «ыраастык» уурсаллар эбэтэр баал ылсаллар. Ол кэнниттэн тута тураннар, эриирдээх, сыралаах киирсии хаттаан саҕаланар. Хотторбуттарын ситиһээри, «иэстэһээри» сорунуулар! Кыһыйыы-абарыы баара буолуо да, биллэрбэттэр. Көлөһүн аллыар диэри күүстээх үлэ икки-үс чааһы быһа барда. Абытай хамсаныылар!  Бырахсыылар киэнэ кытаанаҕа. Ойоҕоһуттан көрөн кэтии сылдьар тустаах тренердэр хаһыылара-ыһыылара сүрдээх. «Кымньыылыыллар». Хапсыһа сылдьар тустуук уолаттары көрөҥҥүн саллаҕын уонна эмиэ да аһынаҕын. Тустуук буолбатаҕым да үчүгэй эбит диэн санаалар киирэллэр. Быыһыгар, бырдалара быстыбыттары, салгыы киирсэртэн аккаастанааччылары син өйдөөн көрдүбүт. Үгүстэр мохсоҕол курдук түсүһэллэр, хахайдыы хабарааннык хапсыһаллар. 

Кэтэһэн олорооччулар көбүөргэ тахсар, уларытыһар кэмнэригэр эрэ тыын ылаллар, сынньана түһэллэр. Онтон эмиэ кытаанах хапсыһыылар. Тренер Егор Терентьевич Пономарев  хамаандатынан, свистогунан көбүөргэ киирэллэр-тахсаллар. Тустан бүппүттэр көбүөр кытыытыгар истиэнэҕэ өйөнө олорон, кинилэри солбуйа тахсыбыт утарсааччыларын хапсыһыыларын көрөллөр, албастары тутталларын, хамсаныыларын үөрэтэллэр, чинчийэллэр. 

«Киирсэргэ бэлэммит!» 

Сүрүн тренер Вадим Эдуардович Семенов: «Бэлэмнэнии күүскэ барда. Монголияттан эрдэ кэлэннэр биһигини кытта бииргэ эрчилиннилэр. Ааспыт кыһын тренербит Василий Прокопьевич Неустроев Японияҕа бара сылдьан кэпсэтиитин түмүгүнэн күн тахсар дойдутун бөҕөстөрө быйыл кэлэн кыттыахтара. Омуктары кытта киирсэрбит биһиэхэ сайдарбытыгар үчүгэй. Иннибитигэр Коркин, Крылов, Арассыыйа Кубога тураллар, онтон Красноярскайга Ярыгиҥҥа барыахпыт. Бу «хонтуруоллуур хапсыһыылар» кэннилэриттэн «бойобуой» ыйааһыннарыгар киириэхтэрэ. Коркин турнирыгар киирсэргэ бэлэммит».

Олимпийскай оонньуулар, аан дойду, Европа, ССРС чөмпүйүөнэ Павел Павлович Пинигин: «Улуу учууталбыт, тренербит Д.П. Коркин аан дойду таһымнаах турнирыгар тустууктарбыт  хамсаныыларыттан көрдөххө, бэлэмнэрэ үчүгэй. Турнир саҕаланара биир нэдиэлэ хаалла. Күүстээх спортсменнар кэлиэхтэрэ. Интэриэһинэй хапсыһыылар буолуохтара. Уолаттарбыт ситэн-хотон эрэллэр. Маҥнайгы улахан түһүлгэ буолар. Ярыгин сүүмэрдиир Гран-при турнирыгар «репетиция» курдук. Онно бастаабыттар –Европаҕа, миэстэлэспиттэр аан дойду Кубогар, турнирдарга кыттыахтара. Коркин көбүөрүгэр уолаттарбыт бэйэлэрин үчүгэйдик көрдөрдөхтөрүнэ, Ярыгиҥҥа үчүгэйдик тустуохтарын сөп. Омуктар үгэс курдук 57 – 70 кг күүстээхтэр. Уолаттарбыт бэйэлэрин дойдуларыгар, «истиэнэлэригэр»,  үчүгэйдик тустуохтара диэн эрэнэбин». 

СӨ сүүмэрдэммит хамаандатын бэлэмниир Киин дириэктэрэ, Арассыыйа спордун маастара Михаил Дмитриевич Пахомов: «Сүүмэрдэммит хамаандабыт бөҕөстөрө Коркин турнирын иннинэ хайдах туруктаахтарын көрөбүт. Бу кэнниттэн ыйааһын түһэриитигэр, туйгун туруктарыгар киириигэ барыахтара. Эппиэттээх  кэм. Хайдах-туох  эрчиллибиттэрин, бэйэлэрин көрдөрүөхтэрэ. Ол кэнниттэн бүтэһик ырытыы, түмүк оҥоруута. Коркин турнирыгар «оптимальнай формаларыгар» кэлиэхтээхтэр. Күрэхтэһиигэ 100 % бэлэмнээх тиийиэхтээхтэр. Эдэрдэр, уопуттаахтар бары тустуохтара. Турнирга тустуу сайдыбыт, тустууга үтүө үгэстэрдээх дойдулары ыҥыртаатыбыт. Белоруссия, Азербайджан, Узбекистан, Япония, Куба курдук дойдулартан кэлиэхтэрэ. Арассыыйа сүүмэрдэммит хамаандатыттан, регионнарыттан элбэх тустуук кэлиэҕэ. Уолаттарбыт, киирсиэхтэрэ, кыайыахтара. Кэлэр нэдиэлэ бэнидиэнньигиттэн, оптуорунньугуттан хамаандалар күргүөмнээхтик кэлитэлиэхтэрэ». 

Айтал Оконешников, идэтинэн инженер, «Сахатранснефтегаз» үлэһитэ, тустууну киинэҕэ устар, кэпсиир суруналыыс, көҥүл тустууга спорт маастара: «Сүрүн үлэм быыһыгар Д.П. Коркин турнирын сылын ахсын устабын. Коркин турнирыгар икки күн быһа холбономмут тустуулары кэпсиэхпит. Сэргэх хапсыһыылар күүтүллэллэр. Япония турнирга кыттыбатаҕа ыраатта. Азия чөмпүйүөннэрэ кэлэн иһэллэр. Тустууктары, тренердэри кытта кэпсэттим. Харахтара «уоттаах», киирсэр, тустар баҕалара күүстээх. Аһыллан тустуохтара». 

Эрэл баар!

2008 сылтан ыытыллыбыт Д.П. Коркин норуоттар икки ардыларынааҕы турнирыгар Сахабыт сирин бөҕөстөрө биир да сылы көтүппэккэ кыһыл көмүс мэтээллэри ылаттааннар, тустууну таптааччылары үөрдүбүттэрэ. Былырыын, 2024 сыллаахха, Лев Павлов 51 кг, Александр Авелов 61 кг, Виктор Рассадин 74 кг бастаабыттара. Константин Капрынов 70 кг – үрүҥ көмүс, Андриан Ленскэй 86 кг, Ньургун Сергин 92 кг, Максим Толмачев 96 кг, Никита Хабаров 125 кг боруонса мэтээллэри аҕалтаабыттара. 
Күүтэбит, кэтэһэбит. Ситиһии тосхойдун!