“Коменданскай чаас” бириэмэтэ уларыйар

Сокуоннай саастарын ситэ илик оҕолор уопсастыбаннай сирдэргэ улахан киһи, төрөппүт арыалдьыта суох сылдьаллара бобуулаах.

• Сайын бэс ыйын 1 күнүттэн атырдьах ыйын 31 күнүгэр диэри – 23:00-06:00 чч.
• Үөрэх кэмигэр – 22:00-06:00 ч.

Санатан эттэххэ, 2009 сылтан дойду үрдүнэн 18 сааһыгар диэри оҕолорго коменданскай чаас диэн баар буолбута. Бу кэмҥэ төрөппүтэ, төрөппүтү солбуйар, кинилэр оннугар эппиэтинэһи сүгэр улахан дьоно суох сокуоннай сааһын туола илик оҕо уулуссаҕа, уопсастыбаннай миэстэлэргэ сылдьара көҥүллэммэт. Коменданскай чаас уопсай Быраабылалара 124 нүөмэрдээх Федеральнай сокуоҥҥа тирэҕирэр.

Өскөтүн эрдэҕэс оҕо ити этиллэр кэмҥэ төрөппүтэ, опекуна суох сылдьар буоллаҕына, комендантскай чаас сокуонун кэспитинэн ааҕыллар. Төрөппүт административнай эппиэтинэскэ тардыллар.

Оҕо түүҥҥү кэмҥэ улахан дьоно суох сылдьар түгэнигэр бастаан утаа сэрэтии эбэтэр 500 солкуобайтан саҕалаан, 2 тыһ. солк. диэри кээмэйдээх ыстараап көрүллэр.

Оҕо иккистээн тутулуннаҕына,  ыстараап суумата 4-5 тыһ. солк. диэри улаатар. Ону тэҥэ 5 сууккаҕа административнай хаайыыга, ол эбэтэр реабилитациялыыр кииҥҥэ киириэн сөп. Хаһыстаан да түбэспит оҕону анал учуокка туруораллар.

Уопсастыбаннай миэстэҕэ туох киирэрий?

Уулусса, паарка, тулаһа, элбэх кыбартыыралаах дьиэлэр тиэргэннэрэ, уопсастыбаннай тырааныспар, интэриниэт-кафе, көмпүүтэрдиир кулууптар, саататар заведениелар, маҕаһыыннар, стадионнар, подъезтар.